饮食｜乌冬原名系馄饨？赞岐和稻庭乌冬有咩分别？
日本人爱吃面。乌冬、拉面、素面、荞麦面，被称为四大国面。其中乌冬，更是日本人国面票选中，名列前茅排第一，堪称国面中的大哥大。不论是香川县的赞岐乌冬，抑或秋田县的稻庭乌冬，都各有拥趸。食咗咁多年乌冬，咁你又企边一边？
乌冬系日本人票选第一位国面，地位超然。
赞岐稻庭两大派
乌冬派别多，最大两派，当数赞岐同稻庭，其实食咗咁多年，你知唔知道两者有乜嘢唔同？今日不如补补课先。先讲产地，赞岐乌冬系由香川县出产，稻庭乌冬则来自秋田县，一个喺四国濑户内海旁边，一个喺本州东北地带，相差十万八千里。再讲形状，睇真啲，赞岐乌冬面条呈正方形，而稻庭乌冬面条呈扁长形，两种完全唔一样。跟住到口感，赞岐乌冬粗壮结实，烟韧弹牙，十足浓眉汉子。稻庭乌冬则比较软滑，清爽细腻，似个小家碧玉。最后论出身，赞岐乌冬喺古时系属于平民美食，极受大众欢迎。而稻庭乌冬古时系供应俾贵族同天皇食嘅，平民百姓好少机会食到。至于历史，稻庭乌冬据说有近三百多年历史，始于江户时代，以秋田县汤沢市稻庭町嘅佐藤吉左衞门家为正宗，流传至第七代佐藤养助，成为当地顶级乌冬名牌。至于赞岐乌冬，历史比稻庭更悠久，有传早喺唐代已由中国传入，关键人物，正是下面呢一个和尚。
香川县人认为，乌冬系由弘法大师空海传入日本。
弘法大师传日本
传闻将乌冬传入日本国土嘅，系弘法大师空海。空海系何许人？你咁问，就真系少年你太年轻了。空海法师，俗名佐伯真鱼，香川赞岐人，生于公元774年，卒于835年。公元804年，随日本遣唐使入唐学法，系唐代日本留学僧人，师承今西安青龙寺惠果门下，受获传承付法第一人，赐受法号遍照金刚，谥号弘法大师。佢喺唐朝学法后，携回大量佛教经典返日本，喺梵文字母拼写原理启发下，发明咗日本字母平假名，创造咗日本文字。之后创立真言宗，成为开山祖师，喺日本佛界享有崇高声誉。被誉为日本平安时代最伟大佛法大师。据传，佢喺唐朝除咗带回佛经，仲带咗乌冬制法返赞岐。据说当时濑户内海一带雨水稀少，赞岐人种唔到稻米，就快要饿死，空海就将喺中土学到嘅一种以小麦磨成面粉再制成嘅面条，教当地人制造作为粮食，拯救咗赞岐当地嘅贫民。呢种面食，一般认为，就系现在赞岐乌冬嘅原型。
好难想像，乌冬前身系馄饨。
乌冬原来系馄饨
不过呢种讲法，只系乌冬起源嘅其中一种讲法。仲有一种，话说奈良时代，日本流行唐果子，即系唐朝传入嚟嘅糕点。当中以索饼、馎饦同馄饨三种最受欢迎。其中馄饨，原名混沌，系指一种用面粉包住肉馅，或煮或蒸嘅食物，极似今日嘅饺子或云吞。据十八世纪江户时代幕臣伊势贞丈喺著作《贞丈杂记》中记述：「馄饨又云温饨，用小麦粉作如团子也，中裹馅儿，煮物也。云混沌者，言团团翻转而无边无端之谓也。因圆形无端之故，以混沌之词名也。因是食物，故改三水旁为食字旁。因热煮而食，故加温字而云饂饨也……今世云饂饨者，切面也，非古之馄饨。」从文字记录中可以睇到，馄饨最初传入日本系有饀嘅，但后来慢慢演变，变成冇饀嘅切面。呢种面，由于蜕变自馄饨，而饂饨，日文就系うどん（udon），即系今日我哋叫嘅乌冬。所以有理由相信，今日我哋熟悉嘅乌冬，前身就系唐朝传入嘅馄饨。哗！咁复杂嘅？睇到混混沌沌系咪？咁不如唔好睇住，食番碗乌冬，慢慢消化下啦。不过，你想食赞岐定稻庭？
