【饮食】中国人3600年前已开始食芝士？焦糖味芝士你听过未？
外国人，个个都食芝士。蓝芝士嘅浓郁发酵味、摩萨里拉芝士嘅淡淡奶香、甜甜哋嘅马斯卡彭芝士、劲羊奶香嘅菲达芝士……仲有充满焦糖味嘅挪威 Brunost 芝士，成千上百种，好似刘姥姥入到大观园咁，讲都讲唔晒。到底芝士系边个发明？几时出现嘅呢？
蓝芝士，爱者爱极，恶者恶极，你属边极？
芝士竟然有焦糖味
话说点解要讲芝士，事缘最近有一只挪威百年芝士品种，第一次嚟咗香港。杰托斯特芝士，挪威话系：Brunost。系用牛奶同羊奶混合制成，1863年挪威 Gudbrandsdalen 村庄嘅人，已经开始制作呢种芝士。佢同我哋一向食开嘅芝士好唔同，甜甜咸咸，仲有一阵焦糖香味，真系打破我哋一向对芝士嘅印象。点解会有焦糖味呢？唔系加咗焦糖，而系制作嘅时候，先会喺羊奶中分离出乳清，再将乳清加热，再加入奶油及牛奶，煮到水份蒸发，形成焦糖化，芝士就会变成啡红色，加热时间愈长，芝士颜色亦会愈深，味道仲带有甜甜焦糖味，就咁食，做菜式，或者整甜品，甚至芝士火锅都得，系挪威人心中嘅美食国宝。
Brunost芝士，有股焦糖香味，系挪威国宝，十分独特。
沙漠高温颠簸撞出嚟
其实芝士嘅制法，几千年前来一直大同小异。相传芝士起源于阿拉伯，佢嘅出现，系一个美丽的误会。话说大约在六千年前，阿拉伯商人，要远行做生意，佢哋会骑骆驼，为防中途口渴，会将牛奶同羊奶放入皮袋入面，绑喺骆驼侧边，随身携带，方便随时饮用。但系，佢哋通常一行就几个钟或以上，加上又喺冇瓦遮头嘅沙漠上，艳阳高照，骆驼颠簸，高温摇足几个钟，皮袋入面羊奶早已分成两层，上层变咗透明乳清，下层就沉淀成白块凝脂。原来皮革中含有类似凝乳酶嘅酵素，喺旅途颠簸摇荡同太阳高温照射下，牛奶同羊奶慢慢发酵，形成呢种半固体状态，就系最原始嘅芝士嘞。
今日有芝士食，要多谢阿拉伯骆驼商队。
风行欧亚非洲三千年
由于芝士既可以保存多余嘅牛奶，又方便作旅行食物，慢慢就开始流传到欧洲、中亚、中东，甚至非洲地区。2010年法国考古学家就喺埃及塞加拉嘅古城孟菲斯巿长卜塔迈斯嘅墓穴入面，发现咗三千二百年前嘅芝士残渣，系全球最古老嘅芝士残渣实物。公元前二千年初期，乌尔第三王朝入面嘅苏美楔形文本，亦有记载芝士呢样嘢。同期埃及墓葬壁画中，亦有描绘芝士嘅制作，足见𠮶阵时，中东同非洲一带嘅人都已经识得制做同食用芝士。至于古代中国有冇出现过芝士呢？答案系有嘅，喺新疆塔克拉玛干沙漠就发现中国现存最古老嘅芝士，据分析当中嘅蛋白质同脂肪，证实制作时间约为公元前一千六百多年，虽然比起中东、欧洲或非洲要迟少少，但系迟到总好过冇到，外国人 say cheese，中国人都可以 say cheese 啦。
用芝士做甜品，女士们又要准备第二个胃喇！
