【饮食】日本炭烧咖啡本来系畀穷人饮？点解变成品味象征？
自认是哈日人，或者是中产者，一杯炭烧咖啡，系不可缺少嘅品味象征。深褐嘅颜色，浓涩嘅味道，炭焙的香气。捧在手，呷一口。从喉咙深处发出「呀~~」的一声，和饮黑啤一样咁man，一样咁有型。
浓重嘅烘焙味，系日本炭烧咖啡嘅特点。
穷人の恩物
之但系，喺呢个咁中产嘅时刻，如果我话俾你听，日本炭烧咖啡，原来唔系乜嘢高档嘢，佢嘅源起，实在系因为穷到㶶，咖啡豆仲要特别渣过人。咁，会唔会有啲扫兴呢？唔紧要啦，都咁大个人咯，应该能够接受真相嘅。件事系咁嘅，话说日本战后，百废待兴，经济崩溃，人民生活十分贫穷。那时，日本本土没办法种植咖啡豆，只能向外国进口，但要向外进口优质咖啡豆，又没有财力。于是，日本的咖啡职人，便开始研究点样至可以用劣质嘅咖啡豆冲出美味嘅咖啡，几经考量，终于俾佢哋谂到呢种做法。炭烧，就系利用炭做燃料烘焙咖啡豆，由于使用嘅咖啡豆，都是下价的渣豆，味道不醇，杂味极多，所以喺烘焙过程中，只能选择深度甚至重度烘培，希望藉炭火的浓厚烟火味，掩盖渣豆嘅杂味，结果重度烘培令到咖啡豆所有味道都被掩盖，甚至连苦味都去到极限，连涩味都冇埋，剩低炭烧嘅浓郁香气，别树一帜，与别不同，反而吸引咗一批爱好者追逐，成为日本咖啡代名词，日本人称之为「苦炭烧」。
以往因为用平价豆，所以要重度烘焙嚟遮掩杂味。
将军の咖啡
其实，利用炭火嚟烘焙咖啡豆，亦唔系二战之后才首次出现嘅。早在日本江户幕府时代，第十五代将军德川庆喜，就系一位热爱咖啡嘅将军。话说佢任将军时，希望借助法国之力进行西化，佢自己本人亦西化咗先。佢从法国人身上首次见识到咖啡这回事，并且一试钟情，成为咖啡迷。𠮶阵时，德川庆喜饮嘅咖啡，无论选豆、烘焙、冲煮，全部由法国人一手包办。咖啡豆，系来自印度的阿拉比卡咖啡豆。而烘焙嘅燃料，顺理成章采用当时日本最常用嘅燃料：木炭。结果，呢种用木炭为燃料烘焙出嚟嘅咖啡豆，带有一种木材炭火的香气，成为德川将军至爱的口味。也可能因此，启发咗后来二次世界大战之后，咖啡职人重做出呢种日本专有嘅炭烧咖啡口味来。
今时今日嘅炭烧咖啡，已经成为日本品味饮食象征。
职人の精品
不过，尽管炭烧咖啡起源于战后贫穷，但随着日本喺上世纪六七八十年代经济腾飞，一跃而成世界上最富裕国家之一，炭烧咖啡亦唔需要再屈喺战后贫穷嘅位置了。首先，咖啡豆已经唔需要用最差等级，唔少炭烧咖啡，会拼配世界各地唔同品种嘅咖啡豆嚟制作。哥伦比亚、巴西、爪哇等地嘅咖啡豆，便经常出现喺炭烧咖啡上，而烘焙亦唔需要只做到重度烘焙，中度或深度烘焙都一样可以。萃取亦讲究好多，日式手冲或者冰滴都常见，利用较低温度，长时间滴滤进行萃取，小心避开杂味，只萃取出口感纯净嘅部分。于是炭烧咖啡口味变化更多，唔再局限喺旧时一味苦，仲可以品尝到香，甘、醇、浓等唔同层次嘅味道。随着技术提升，加上日本人精益求精嘅精神，今日嘅炭烧咖啡，亦都由以前穷人恩物，变成高阶品味代名词。所以，如果你钟意饮炭烧咖啡，咁就唔系代表你穷，而系代表你识得欣赏日本𠮶种职人精神，呷多两啖，真系人都型啲架。
职人精神，系日本炭烧咖啡嘅灵魂。
