【饮食】东瀛名物铁板烧源于成吉思汗？红遍日本因为一块废铁？
继续日本饮食系列。刺身、寿司、拉面、天妇罗都讲过，轮都轮到佢喇啩。铁板烧（teppanyaki），系由两个字组成。teppan 意即铁板，yaki 就是烧。客人坐喺铁板前，厨师企喺铁板后，即席烤烧，不单色香味俱全，偶然爆个火球，抛接钢铲，更加系一场表演。呢种咁独特嘅饮食文化，寻根究柢，唔系源自日本，而系同当年叱咤欧亚嘅成吉思汗有关。
铁板上的美食，令香港人趋之若鹜、神魂颠倒。
大汗的食物
讲到铁板烧系成吉思汗发明，呢个未免粗疏咗少少。不过话同佢有关，咁又不太过份。事缘系咁嘅，相传成吉思汗西征北伐，一次野外栖宿时，见到架喺篝火上嘅肉熏到焦黑唔食得，佢脑筋一转，攞咗个士兵铁盔放喺篝火上，然后拔出腰刀，将猎来嘅羊肉片成薄片，贴喺头盔上面烤，烤成外焦内嫩，仲食到津津有味。士兵见到大汗咁豪迈，照办煮碗，如法炮制，慢慢呢种食法，竟然大红于军中，并称为「成吉思汗铁板烧」。后来蒙古大军西征，呢种食法亦随军传到中亚同欧洲。之后辗转传回东南亚及日本，据说日本有名嘅札幌铁板烧，就系源自中国内蒙古嘅成吉思汗铁板烧。
到底系咪成吉思汗发明了铁板烧，至今众说纷纭。
水手的游戏
不过呢个讲法，西班牙人第一个唔同意。因为芸芸流传中，有一个讲法，系话今日嘅铁板烧，其实系由西班牙人发明嘅。话说十五．六世纪，大航海时代展开，西班牙航运发达，率先扬帆远征，到世界各地殖民及贸易。𠮶阵时一出海，最少以月计年计，船员镇日对住个大海，生活枯燥乏味，最大嘅娱乐就系钓鱼。不过钓埋咁多鱼，都要谂下点食法。西班牙水手就谂到将现钓嘅海鲜，放喺烧热嘅铁板上，鱼鲜被铁板灸烤到皮香肉熟，又保留到海鲜嘅汁水，因此深得水手们欢迎。后来呢种煮法，随着西班牙人传到美洲大陆，影响咗墨西哥同今日加州一带嘅饮食文化，之后再经美国人传到欧洲，开始影响到法国。十九世纪末更传到日本，影响了后来日式铁板烧嘅出现。
火球一起，色香味俱来，Good Show！
青年的创意
系嘞，讲到日式铁板烧。据闻系二十世纪初，由一位日裔美国人引进日本嘅。不过亦有讲法系，今日嘅日式铁板烧，其实同日本传统嘅锄烧好相似，可能系由锄烧演变而成。1896年，神户元町嘅牛肉锄烧店「月下亭」开幕，店家用一个扁平到似铁板嘅锅子嚟烧薄切牛肉，仲混和高丽菜丝同其他食材，颇有现代铁板烧嘅雏型。呢个雏型，去到1945年，终于演变成今日嘅铁板烧。𠮶时二战结束，到处都系废铁，本来喺神户做开咖啡店与咖啡豆批发嘅青年藤冈重次，就用造船厂用剩嘅废铁做成铁板，以铁板代替锄烧烤食物，开咗间餐厅叫MISONO。佢见当时大量美军驻扎，索性将铁板搬到室外，喺铁板上烧牛扒，结果生意火红，人人争相仿傚。呢种食法，更引嚟美国记者采访，并问藤冈呢种食法叫乜嘢名。藤冈见系用铁板嚟烧食物，灵机一动，就将佢命名为 teppanyaki，意思即是铁板烧。如今，「Teppanyaki」已被收录喺英文辞典入面，成为日本重要饮食文化之一。
时至今日，铁板烧已经系世界美食，人人都喜欢。
