【饮食】又系中国发明！日本拉面源自广东乡里？同明朝遗臣又有关？
关于日本拉面，香港人岂止耳熟能详，简直成精成仙。札幌拉面、博多拉面、东京拉面、熊本拉面、长崎拉面……酱油汤底、猪骨汤底、盐味汤底、味噌汤底、鱼介汤底、鸡白汤底……直面条、挛面条、粗面条、幼面条……肥叉烧、瘦叉烧、紫菜、芽菜、笋条、粟米粒、溏心蛋、温泉蛋……无论乜嘢口味、乜嘢汤底、乜嘢面条、乜嘢配料，都总有办法喺香港揾到。香港日本拉面店也成千上百，梗有一家喺左近。
日本拉面，肯定系香港人最爱嘅日本食物之一。
日本拉面雏型
香港人咁钟意食日本拉面，可能同日本拉面嘅渊源有关。关于日本拉面嘅渊源，目前最少有三种说法。最多人讲嘅，就系日本江户时代，水户藩藩主德川光圀从明朝遗臣朱舜水带来的厨师身上，首次尝到日本拉面嘅雏型。朱舜水系明朝大学者，自清军入关，永历帝流亡缅甸，朱舜水为表忠节，毅然离开中土，远赴日本，著明朝衣冠，著书讲学，终身不履故土。同佢随行去到日本嘅，除咗家眷，仲有厨师，其中一位来自广东。有一次，因为要煮嘢俾水户藩藩主德川光圀食，就喺汤乌冬中加入大蒜、姜等食材，德川光圀食过觉得好味，由于系中国厨师所做，自此之后呢种汤乌冬就被称为支那面，成为日后日本拉面嘅源头。
Ramen就系汉字「拉面」嘅音译，证明又系来自中国。
广东厨师炮制
另一个说法，都系同广东人有关。话说1853年美国海军准将培里率舰队驶入江户湾浦贺海面，打开日本锁国局面后，日本开始向世界各国开放通商。其中横滨、神户、长崎等港口，好快就嚟咗一大批中国商人，佢哋除咗做生意，亦将饮食文化引进日本。当中广东汤面大受欢迎，广东厨师喺鸡汤中，加入手打面条同葱花，被称之为南京面，成为日本中国餐馆中的一个菜色。1884年函馆嘅中华料理洋和轩，就喺宣传单张入面印有南京面呢道菜式，系现存最早有关南京面嘅文字记录。1890年代后，日本各地都出现主打南京面或支那面嘅中华料理，慢慢演变成后来嘅日本拉面。
日本拉面口味源自广东，但面条就蜕变自山西、陕西嘅制法。
改良遍地开花
第三种讲法，系话1910年东京浅草区一家名为来来轩嘅中式餐馆，日籍店主尾崎贯一请咗批来自横滨南京町，即系今日横滨中华街嘅中国厨师嚟坐镇。呢班厨师，改良咗横滨南京面嘅做法，喺汤底中加入酱油，配料中加咗叉烧、鸣门卷、紫菜、菠菜同笋干。尾崎贯一称呢款新做法拉面为支那面，由于整个制法及配料等等，同今日嘅东京拉面几乎完全相同，所以被称为现今拉面的开端。
之后拉面做法大抵定型，只系传到日本唔同地方，又发展出唔同嘅风格同口味。好似东京嘅酱油拉面，就传承来来轩嘅酱油汤底，成为本州最具代表性口味。去到九州，又发展出用猪骨长期熬煮变成白色浓汤嘅猪骨汤拉面，系好多香港人嘅至爱。传到北海道，就分成两支，函馆一支，就专注用盐做汤底，发展出北海道独特盐味拉面，由于风格较清淡，同其他风味相比，更能突出食材本身嘅味道。另一支，就系札幌嘅味噌拉面，佢哋使用鸡肉或猪肉熬汤底，再加入日本传统嘅味噌酱调味，味道浓郁，真系一试又难忘。
经过咁多年发展，如今拉面已经成为日本人心目中嘅国食。
