【饮食】冥冥之中！天妇罗传入日本源于船只迷航？德川家康因佢而死？
日本名食系列之中，除咗刺身、寿司之外，仲有天妇罗。鲜虾南瓜野菜等等食材，蘸上炸浆，掉进滚油中炸。嘶咧吵嘞中，炸出外浆薄脆，内里烫热新鲜的美食，再睇睇碟上垫底的纸，不沾半点油。哗！这神乎奇技，就是闻名世界的日本国食天妇罗了。
外浆炸得香脆，内里 Juicy 嘅天妇罗，系好多人嘅最爱。
本来去澳门
不过，讲天妇罗系日本国食，咁又犯咗政治不正确毛病喇。唔系唔系，今次唔系源于中国喇，天妇罗呢味嘢，系百分百由西洋传入嘅。话说1543年，西方大航海时代，一艘葡萄牙商船正在茫茫大海之中驶向澳门，准备同中国做生意。点知航行途中偏离航向，最终去唔到澳门，而系登上一个小岛 ─ 种子岛 (Tanegashima)，日本九州南侧一个岛屿。
熟悉旅游嘅人都听过呢个地方，除咗有阳光海滩同火箭基地外，更系著名嘅「铁砲传来事件」，即系西方第一支火砲传入日本嘅地方。𠮶支火砲，其实就系葡萄牙人传入，其实除咗火砲，亦同时传入咗天妇罗呢种食物，因为迷航𠮶只船上有三个葡萄牙水手登岸，成为第一批踏上日本国土嘅欧洲人，三个水手留低做生意，佢哋用家乡手法，将面糊蘸青豆炸香嚟食，呢道炸青豆，葡文叫做 Peixinhos da Horta，就系日本国土上第一道天妇罗。
大航海时代，葡萄牙嚟到日本，除咗做生意，仲传入美食。
传咗入日本
其实呢种用面糊蘸食材炸嘅手法，早于1543年前就已经存在，佢系葡萄牙人守斋期嘅食物。话说葡萄牙人信奉天主教，每年复活节前六个半星期，就系佢哋嘅大斋期，期间禁食肉，教徒于是将蔬菜蘸面糊炸嚟食，就系水手整嘅 Peixinhos da Horta 嘞，而 Peixinhos da Horta 字面上嘅意思就系：菜园中嘅鱼，其实系斋口唔斋心。呢种食物系为守大斋期而食嘅，而守大斋期嘅拉丁文就系：ad tempora quadragesima，后来日本人就用咗 tempora 呢个名，日文音译てんぷら，汉字称作：天麸罗或天妇罗。
去到16世纪，天妇罗经传教士和商人传入日本长崎，开始流行起嚟。1669年写成嘅《食道记》，更出现记载天妇罗制作方法。天妇罗流行到一个点，连战国时代大名德川家康都系粉丝。传说德川家康听闻京都流行天妇罗，吩咐人照做，用芝麻油炸真鲷，搭韭菜一齐食。点知德川家康当时有肠胃病，食咗天妇罗之后，病况恶化，三个月后就去世，唔知佢嘅死，系咪同天妇罗有直接关系呢。
关东派爱海产，关西派爱蔬菜，咁你最爱系乜？
红到要分派
只知道天妇罗经过日本人改良，逐渐同当初葡萄牙水手嘅做法有出入。食材方面，除咗炸青豆，仲有番薯、地瓜叶、海苔、莲藕等蔬菜外，甚至将海产入馔，炸虾、炸鱼、炸鱿鱼、炸贝类等等都有。炸浆亦渐渐多元化，小麦粉、木薯粉都可以做炸浆；除咗用水调和，亦会加入蛋黄、蛋清、酱油、味噌等等嚟增加风味。
慢慢天妇罗仲按地域发展出唔同门派，好似关东派，重海鲜，一般鱼贝会完整咁炸，唔切件。面粉通常会混合蛋汁，用芝麻油低温炸，需时较长，油脂味和酱油味特别浓厚。而关西派，爱用蔬菜，粉浆用水和面粉开成，以热油高温炸，时间短，所以关西天妇罗颜色同口味较为清淡。无论你钟意关东定关西，钟意鱼贝定蔬菜，下次食天妇罗时，记得叫炸青豆，因为呢道系天妇罗元祖，食佢就可以讲古仔，讲下四百几年前，天妇罗系点样因为只船行错路，而出现喺你面前嘅餐碟上。
便当都有天妇罗，真系睇见都流口水。
