【饮食】港式奶茶源于英国人 咁英国奶茶源于边度？
要数香港代表性食物，奶茶肯定走唔甩。浓郁嘅红茶，撞入香滑嘅花奶，加少少砂糖，混调出一种又甜又滑嘅地道本土滋味。由于师傅用棉布茶袋来拉茶，棉袋沾染茶色，成对女人丝袜咁，所以又叫丝袜奶茶。呢杯滑滑丝袜奶茶到底源起边度？当中又有咩古仔呢？
一杯醇滑丝袜奶茶，系好多香港人每日嘅精神食粮。
又关大航海时代事？
众所周知，中国人一向只饮唐茶。即系普洱、寿眉、铁观音呢啲。港式丝袜奶茶，用红茶嚟做胆，一睇就知唔系中国嘢啦。冇错，我们现今饮嘅港式奶茶，系受殖民时代英国人影响嘅。话说十七世纪初，西方大航海时代，荷兰同英国挟住船坚炮利东来贸易，佢哋分别成立咗荷属东印度公司同英属东印度公司，将亚洲一带物资运返本土，茶叶就系其中一样珍品。
香港人嘅三点三，就系蛋挞配奶茶。
又关殖民地事？
英国人更加喺印度广设茶园，种植红茶。红茶运回英国本土，旋即风靡英国皇室贵族。佢哋对叹茶趋之若鹜，玩得好骨子，纯银茶壶、骨瓷杯碟，加奶加糖，发展出一套精致下午茶文化。慢慢呢种风尚流入民间，午后公余，一杯奶茶，一件小饼，成为国民习惯。十九世纪中，香港开埠，上流社会嘅英国人，带嚟下午茶文化，慢慢连庶民大众也爱上。下午三点三，总要唞一唞，到茶档、到冰室，喝一杯浓咧香滑奶茶，慢慢累积成为今日奶茶文化。
泰式冻奶茶，色泽较深，调味较甜。
又关文明古国事？
不过，论到功劳，英国人最多将奶茶发扬光大，但系要追本溯源，边个至系最先发明将奶同奶沟埋嚟饮呢回事嘅呢？其实喜马拉雅山地域一带如印度、不丹、尼泊尔等国家，以及西藏、内蒙古地区嘅人自古都识饮奶茶。不过呢堆国家地区当中，却以印度为出产茶叶最多嘅国家，加上佢系文明古国，文化较周边国家高，小国自然容易受佢影响，因此唔少人认为，印度先至系奶茶嘅发源地。
印度拉茶，可能就系奶茶嘅老祖宗。
又关创意无限事？
而印度奶茶文化，不单受周边国家模仿，连中东阿拉伯国家，甚至非洲埃及、摩洛哥等国家，都受到印度文化影响，发展出加入香料、蜜糖、酥油或奶油混合嘅特色奶茶。至于英国同荷兰呢两个国家，就将奶茶文化先后传到殖民地，如缅甸、马来西亚、印尼、台湾等地，都有自家一套奶茶传统。呢啲国家又再影响到周边国家，好似泰国咁，即使未尝被殖民，都一直有自己嘅奶茶文化。而奶茶文化，到今日仍在发展。好似台湾人将薯粉做嘅珍珠加入奶茶入面，变成红遍全世界嘅bubble tea。香港除咗丝袜奶茶，又有人加入凉粉，甚至同红豆冰cross over，变成凉粉奶茶及奶茶红豆冰，真系创意无限。
加咗凉粉嘅奶茶，你钟意饮吗？
