【住院】英国公立医院好伙食？｜有炸鱼烤牛肉 仲有自选甜品
虽然无人想住医院，但如果一定要入院，而医院伙食好，大概可以为疲惫受伤的身体带来一点慰藉。Touchwood 咁大个女，在香港住医院经验 5 只手指数得晒，已经包括两次生仔，印象中午餐晚餐系无咩选择，更加唔好讲好唔好食了。
英国公立医院都是 NHS (国民保健署)辖下，唔肯定医院伙食系咪个个城市间间医院一样，但大致模式应该都相差无几吧。由早餐开始、午餐、茶点、晚餐，我会话真系估唔到医院伙食可以咁丰富！
先由早餐讲起，一般都有多士 (系热辣辣，有人帮你烘埋㗎！)、加牛奶的谷物早餐如 cornflakes、rice krispies、weetabix 等选择，有专人帮你即冲 coffee or tea，仲好细心问你想要几多包糖，饮开 black coffee 的又可以走奶，尽量迎合各人口味，唔知以为去咗餐厅。
重点落在午餐上，每日有 3 款热食、1 款沙律及三文治选择，3 款热食必定有一款是为素食者而设，拣完热食的主食，未完，还可以自选配菜如薯蓉、薯仔、薯条和是日时蔬，组合完个 main dish，仲有甜品可以拣，除了每日铁胆雪糕、水果包、乳酪，仲有 2 款热甜品，一般都是一款 crumble 搭一款 sponge cake，真系超级丰富！晚餐又有另一个 menu，但组合相似，同样是拣完 main 再拣甜品。
看看印刷精美的餐牌，其实食物选择都几多元化，主食有猪牛鸡肠仔等，多是英国菜中的菜式，一星期 7 日 14 餐都有唔同选择！星期五系英国人的 Fish and Chips day，医院也在当日供应炸鱼薯条，仲跟足传统配埋 mushy pea 豆蓉。炸鱼啖啖肉几有质感，薯条系 fat chip，我最爱，成个感觉同炸鱼店食真系相差不远，加埋甜品 plum crumble，真系饱到上心口。星期日是 Roast Sunday，又有传统到爆的烤牛肉配薯仔加 Yorkshire pudding，真系病人都可以有好口福。
至于早午晚餐之间，仲有几 round 茶点，可以再饮几杯咖啡茶果汁，亦有包装饼、薯片派发，唔少都系超市的热卖品牌与口味。小朋友住院呢，亦有自己的餐牌，热门食物 mac & cheese、lasagne、pizza、chicken nugget、fish finger、burger 等有齐，选择好啱小朋友口味。大家都知英国系多元社会，餐牌中除了有为唔同食物敏感人士而设的餐牌，仲有回教、犹太教、非洲 style 和中式餐牌，尽显对各地人士宗教的尊重。
