【饮食】快餐文化｜鱼柳包早过汉堡包出现？汉堡包系美国定德国人发明？
阿妈呀！呢条题搞到我好乱呀！
乜汉堡包唔系美国国食嚟咩？点解杀出个德国人嘅？鱼柳包明明唔够汉堡包咁受欢迎，点解又会话佢仲早过汉堡包出现？咁到底汉堡包嘅发源地系边度呀？鱼柳包又系边个发明㗎？
汉堡包夹着肉菜酱汁，单手搞掂，快靓夹正，系现代速食代表。
鱼柳包嚟自汉堡？
好多人都以为，汉堡包系快餐文化代表，而美国系快餐文化最大国，咁汉堡包一定系由美国人发明啦！加上大部分人，最先接触汉堡包，都系喺嚟自美国嘅大型连锁快餐店，所以咪产生呢个错觉啰。
汉堡包，英文Hamburger，顾名思义，即是：来自汉堡嘅包。汉堡，咪就系德国第二大城市啰。汉堡近海，系个渔港，1703年就开始有鱼市场集散鱼获，渔民喺早市卖鱼，为求方便充饥，就咁用两块面包夹住腌渍鱼柳嚟食，连炸都冇炸过，据说呢种腥到死嘅鱼柳包，就系最早期嘅鱼柳包。
汉堡渔市场，逢周日有早市，鱼柳包卖足几百年。
汉堡包嚟自美国？
到咗十九世纪，汉堡人除咗会食鱼柳包，仲识得绞碎牛肉做成牛肉饼，由于呢种做法，系汉堡人发明，所以称为汉堡扒。呢种汉堡扒，既便宜又美味，慢慢成为德国人嘅国食，地位同香肠差唔多。20世纪初，德国移民前往新大陆，呢啲移民，将家乡汉堡扒一并传到美洲，汉堡扒于是开始喺美国落地生根。冇错，汉堡人发明嘅系汉堡扒，至于汉堡包，就系另一啲人嘅创作。
1901年，丹麦移民路易斯·拉森峰喺康乃狄克州纽黑文市嘅路易斯餐厅，推出用两片白面包夹着洋葱、番茄、芝士嘅免治牛肉饀包，自称系历史上第一个汉堡包，不过横睇掂睇，呢款包似三文治多过汉堡包。
薯条加汉堡包，系世界人类共同嘅美食记忆。
汉堡包属于世界？
后来，佢嘅生意对手，都纷纷声称自己至系原创，争拗一直不绝，好难确定谁是始作俑者，但可以肯定嘅系，呢种用面包夹住牛肉饼嘅汉堡包，喺1904年嘅圣路易斯斯博览会后开始爆红。根据当时《纽约论坛》嘅报道，称呢款夹住汉堡扒嘅包为：路边小贩嘅创作。赞叹呢种新食法令人眼前一亮，报道亦令汉堡包红遍整个美国，亦由美国一直传播到世界各地。一百年后，世界各地都有汉堡包，款式五花八门，牛肉、猪肉、羊肉、鸡肉全都可以成为汉堡。甚至用大蘑菇、素菜代替肉类，变成健康潮流。
至于鱼柳包，要去到1962年至大红大紫，美国俄亥俄州辛辛那提市嘅麦当劳特许经营人卢·格伦，发明用炸鱼柳做饀嘅鱼柳包，1963年正式登上麦当劳常设餐单，并于1965年喺全美推广。鱼柳包呢位大哥终于吐气扬眉，成为世界知名嘅快餐食物。
五花腩都可以做汉堡，仲要系迷你版本。
