【饮食】饺子原本叫「娇耳」用作医病？点解饺子皮有方形圆形之分？
中国有一种食物，不分地域，人人都食。
以面团压扁，用棍擀成薄皮，包上肉或菜饀，捏掐成半月或元宝状。或蒸、或煎、或煮，或炸，总之饀料汁水，都被面皮包着，一咬，皮破汁出，鲜美无比，这就是大江南北家传户晓的美食：饺子。
饺子唔觉唔觉，已有超过一千八百年历史。
名称多萝萝
饺子，有好多名。唔同时代有唔同叫法，元明时代称为「扁食」，清代称为「饽饽」。唔同地方又有唔同名，北方普遍叫饺子，南方则称水饺，闽南地区唤扁食，山东一带就叫馉𫗢或者馉饳。唔同食法又有唔同名称，好似陕北一带嘅人，煮嚟食嘅叫「扁食」，蒸嚟食较大只嘅叫「饺子」，再大只啲嘅就叫「角子」。而岭南一带，过时过节亦流行炸「角仔」，亦同饺子包法几近相同。不过无论叫乜名，追溯根源，饺子最先都唔系叫饺子。
用云吞皮包虾猪肉笋丝木耳丝嘅凤城水饺，系南方饺子代表。
东汉医圣发明
话说东汉末年，写出中国医学巨著《伤寒杂病论》嘅医圣张仲景告老还乡，返到家乡南阳郡涅阳县白河岸边时，见到百姓挨饥抵寒，冻到周身病痛，连耳仔都冻到溃烂。张仲景见到咁情况，返屋企摷书，研究出了一道可以御寒嘅食疗药方，做法系用性温嘅羊肉和一啲祛寒草药煮汤，煮熟后将羊肉等料捞起切碎，用面皮包成耳朵咁样，再用原汤再将包好馅料嘅面皮煮熟。一碗热汤，放两三个，食完人体发暖，两耳生热。呢种包饀食物，由于似耳朵，又可以治疗耳朵冻伤，于是称为「娇耳」，而呢碗汤，就叫「袪寒娇耳汤」。
用猪肉研薄成皮包饀嘅燕皮饺，广东同福建都有人做。
南北大不同
后来，每逢冬至，人们就仿照「娇耳」做过年的食物，慢慢呢啲食物又借音叫成「饺耳」、「饺子」。后来传到南方地区，更变成日常生活食物。不过南北两地，饺子无论形状、制法、饀料都有唔同。好似饺子皮，南方主要系方形，北方则为圆形。擀皮呢，南方系先将面团压成大薄块再切成小方块。北方则将面团捏出小面团，再擀成小圆皮。而南方水饺，讲究皮薄。北方水饺，唔介意厚。包法亦有唔同，南捏北挤。形状亦唔一样，南方水饺较长较方，北方水饺包得较圆。饀都唔同，南方会包虾肉、猪肉、笋丝、木耳、冬菇等。北方多为猪肉、大葱、韭菜、鸡蛋等。真系南北大不同，各处乡村各处例。只系好食无分南北，只要啱口味，南北一样通杀，唔使畀面啦！
日本煎饺子，都系源自中国饺子架。
