【小说】洒满落英的街角（八）｜大老板的儿子
嘉嘉，正职旅行嘉，副业打工仔。
2022-05-31 08:00 HKT
字體大小
前文提要：若兰与一同坐镇接待处的Annie，合作愉快。Annie为她提供很多写字楼的八卦，而最新一段消息就是他们老板的儿子又有新女朋友了。
若兰接过Annie递来的娱乐版，望向她手指用力地点着的那幅照片，差点笑了出来：「就凭呢个背影，你就肯定佢系老板个仔！」
「一定系啦，我哋个个都觉得系佢。报纸都咁写！」
「个个都觉得？你哋见过佢咩？」
「见过，成日见，佢公司喺顶楼！」
若兰忽然觉得自己上班已经有一段日子，但是好像连大老板也未见过，更何况大老板的儿子！还是名人！当她把这个消息告诉 Helen 时， Helen 笑到前仰后翻！
「你住得背唔背啲呀？你老板个仔系名人嚟㗎㖞！你真系唔识佢咩？」
若兰心想，自己做了凑仔婆20年，即使小朋友长大后去外国升学、生活，她也很少理外面发生的事。反正，她的最大兴趣，就是绣花！
「你一日到黑闩埋门绣花就得啦！做乜要出嚟做接待员？你一幅绣花都卖唔少钱！」
「又系你话要出去见下世面，而家你又叫我留喺屋企绣花！我唔想再俾你叫我做自闭儿童呀嘛！人哋自闭儿童好聪明好有天份，边有我咁蠢！」
Helen 忽然很温柔的望着若兰说：「同你玩之嘛。自己一个人匿埋喺屋企绣花，对眼唔盲个心都盲！日日唔系食蒸鱼就系食蒸鱼，食饱喺度等仔女打电话过嚟啊，一个礼拜都等唔到一次，听起来也戥你寂寞！而家打下工，识多啲人，知道多啲事，八八卦卦有时都系一种情趣！最紧要有返个节奏，仲有粮出，几好！唔同你讲啦，我走先，约咗个客，转头 e-mail 你老板个仔嘅资料俾你！」
临放工时，若兰收到Helen的电邮，一开就跳出一幅男士的相片，旁边 Helen 写着：「你老板个仔！」
若兰望著那幅相，呆了！
待续......
更多文章
