【饮食】印度美食｜咖喱系释迦牟尼修行时食嘅酱汁？印度从冇一道菜叫做咖喱？
咖喱，风行全世界，大如元宇宙。
印度、巴基斯坦、印尼、泰国、星马、缅甸、日本、台湾、香港、英国、美国、澳洲、新西兰……甚至中东、非洲等地皆有。然而，追本溯源，咖喱源于印度，但印度却从冇一道菜叫做咖喱，到底发生咩事？
泰国咖喱炒蟹，加咗鸡蛋和椰奶做酱汁，惹味非常。
从印度出发
各位同学，今堂讲咖喱。咖喱可真厉害了，追寻佢嘅足迹，可以从印度出发，跨越重洋去到英国，再传遍欧洲大陆，再由欧洲散播到美洲、非洲，绕了世界一圈，又返到亚洲，喺东南亚、日本等地落地生根，最终遍布全球，仲因地而变，慢慢成为唔同地方各有唔同口味，终成地球界食物。传播之广、影响之深，几乎冇一种食物可以相比。
五颜六色的印度咖喱，各有不同味道，睇见流口水。
又关佛祖事
咖喱最初嘅模样，到底系点嘅呢？咁要返到好耐之前嘅印度，当地民间，有个关于咖喱起源嘅口耳相传故事。传说话早期印度人认为猪肉有阵味，羊肉又膻腥，加上佢哋奉牛为神明，唔会食牛肉，于是近乎无肉可食。后来，印度人发现释迦牟尼修行时，会煮一种酱汁嚟食，呢种酱汁系将几十种香料放入锅内熬煮而成，味道浓烈复杂，可以盖过猪羊嘅膻味，大家于是照办煮碗，后来更成为印度人的日常料理。但系，咖喱并唔系菜式名称，系一种烹调方法，名称起源，普遍认为源自香料（karileaf），不过最多人接受嘅讲法，系来自南印度坦什米尔语kari，意思即系综合各种辛辣香料所烹调而成，带有酱或汤嘅意思。
星洲冇星洲炒米，呢个落咖喱炒嘅米粉，系香港人发明。
英国人疯传
本来呢种烹调方法，只系存在喺印度本土。到咗17世纪，印度成为英国殖民地，大量香料运回英国本土，「咖喱」呢种综合香料调制法，开始喺英国流行。19世纪，英国人已经识得将香料同奶油混合，调制成杰挞挞咖喱酱汁，用嚟煮菜煮肉，甚至煮汤。由于合成咖喱嘅香料超多，动辄就有姜黄、芫荽、干辣椒、丁香、肉桂、茴香、肉豆蔻、黑胡椒、辣椒等等，为咗方便使用，就有英国公司首创将所需香辛料磨成粉末，简单方便嘅咖喱粉，乃应运而生，亦快速助长传播普及，咖喱一下子传遍整个欧洲。
日本咖喱会落水果嚟煮，味道较甜，别树一帜。
重返亚细亚
后来，咖喱又随着欧洲人全球殖民，再传到中南北美、非洲大陆及亚洲各国。像日本，早在大正时代开始接受欧美饮食文化，1860年，明治维新启蒙之福泽谕吉，喺佢翻译嘅《增订华英通语》辞典中，首度出现了咖喱（curry）呢个辞汇，可说系第一个将咖喱引入日本嘅人。至于香港，当然系1842年，随着香港成为英国殖民地，大量印度人随英国人来到香港当兵或经商，咖喱开始喺驻港英军军营嘅食堂及餐厅出现，逐渐传到本地民间，发展成今日嘅港产咖喱文化。咖喱始于亚洲，浪游欧洲，传到美洲非洲大洋洲，兜咗一大个圈，最后又传返亚洲，真系名副其实嘅世界美食啦！
坊间有大量即食咖喱供应，想自家煮冇难度。
