【英国置业】买新楼 呢几样最值得花钱 Upgrade
上次讲到在英国买新楼，今次同大家讲下钱，究竟有咩钱要俾？上文已经提及在不同时段先俾 100 镑之后再俾 400 镑共 500 镑订金就可以 hold 一个地段，呢 500 镑连同之后的 10% 大订都会在最后找尾数时扣取，唔称得上是额外使费，今次就同大家分享下英国买楼大致仲有咩使费。
1. 律师费
分为律师楼收取帮你做嘢的费用 (Legal Fee) 和各样文件、search fee 等费用。Legal Fee 因律师楼而异，一般由 600 镑至 2000 镑不等，我哋用发展商律师，费用由发展商支付，面数悭咗 1250 镑。其他 search fee、文件费约 300 至 500 镑。
2. 政府费用
呢条大数主要系印花税。除非你在世界各地从来都无买过楼，否则在英国都不能享受 First time buyer 唔使俾 stamp duty 个优惠 (夫妇二人同体，边个买过都不符合资格)，stamp duty 俾几多视乎楼价，同埋当时仲有无持有其他物业，可以用呢个 stamp duty calculator 帮手计算︰https://www.stampdutycalculator.org.uk/
除此，亦要俾 HMLR fee 约 330 镑作英国土地注册。
英国买屋，好多时售楼书已经讲咗间屋会包啲咩，好似 radiator 暖气、地毯地板、厨房厨柜、焗炉、炉头、抽油烟机、洗碗碟机、basic 灯饰边啲包，以上好多时都有机会可以 free upgrade，至于雪柜、洗衣机、衣柜等则视乎发展商了。
个人觉得，以下几项，如果发展商无包，值得花钱 upgrade。
地板︰房、楼梯都仲可以接受地毯，但厅我还是爱铺地板，清洁方便得多。近年好流行的 laminated floor 价钱经济，已经广为使用。
地砖︰厨房、所有厕所的地下我会选地砖，因为常常湿水，相信比 laminated floor 更耐用。英国屋厕所一般系无去水位，所以拖地都只可以抹干。
墙砖︰厕所一般都系砖墙与板墙的组合，一般预设的 standard tiling，只系把砖铺到去有机会湿水的地方，如洗水盘附近一格仔，厕所马桶后面一幅。高一 grade 系铺 half tiling，即系半幅墙铺砖，冲凉浴室我觉得铺 full tiling 一啲都唔过份，因为长期有湿气有机会令板墙发霉，到时就烦了。
浴室花洒︰一般新屋一间系 shower bathroom，一间系置有浴缸的 bathroom，而浴缸上面系不一定会装花洒的！试问水费贵，又点会日日浸浴呢？无花洒等如叫你唔好用来冲凉。
防溅挡板 (splashback)︰指的是厨房洗手盘和煮食炉对住的一幅墙都铺上防水物料，又系为清洁方便，唔怕油、水弹到一墙都系。
洗干衣机︰就算包洗衣机，一般都要 upgrade 才附设干衣功能，在湿冻的冬天尤其重要。
屋外电掣︰方便使用剪草机于花园剪草，如果唔系就要有个超长拖板了。
其他仲有好多大大小小东西可以加钱 upgrade，好似天花射灯、alarm、屋内大小插头加多、built in 衣柜等等，丰俭尤人。英国近年劲推电动车，因此新屋大多每家有自己的汽车充电，电能家居亦系大势，最后，加大埋屋企个电压也理所当然。
