【小说】洒满落英的街角（三）｜与中佬的相撞
前文提要：若兰找到一份接待员的招聘，于是上门见工。
Helen收到若兰的电话：「唔系话今日见工咩，咁快出嚟？衰咗？」
「掂咗呀，下星期就返工喇！」
「唉，都话靓女打横行喇！」
「几十岁人，仲边有得靓吖！都有要求㗎，要打字，又要用英文同埋普通话对答，仲要冲咖啡！」
「哗，私人秘书都系考呢啲㖞！揾到工咁高兴，过嚟我公司呢边，我同你食个饭庆祝吓。」
「唔得呀，我架车正话见工时喺公司楼下个停车场俾人撞咗，我而家要车去车房整先呀。」
「人撞你㖞，咁快攞去整？佢赔咗俾你未先，如果保险唔赔点计？」Helen真不愧是一个女强人，若兰都未有机会讲解事情始末，她就已经把所有可能性列出，还是站在若兰的角度看。
「系佢撞我尾，但系我冇要佢赔呀。我睇佢系司机嚟，虽然佢个款都几四正，唔讲以为系老板，但系咁大架Maybach点会老板自己揸，要佢赔即系要佢自己出钱，仲会冇埋个奖金，我见我呢架车仔整都系三两千，算喇！而且我而家揾到工，可能系好心有好报呢！」
若兰就是有这项绝技，永远会为别人著想，Helen虽然觉得既然是对方失误，就当然是对方赔，但认识了若兰几十年，也知道她是不会向一个司机追讨撞车费，但也不忘提醒：
「咁有冇写返张纸互不追究呀，咪等阵佢掉转头claim你呀！」
「唔好成日谂坏𠮶面啦，𠮶位先生好好人，仲系佢提我要抄身份证同埋电话，仲叫我第二次唔好随便信人添！」
「抄身分证咪得啰，仲要交换电话？会唔会佢想抄你牌呀？」
「咩呀，唔同你讲喇，停车场够钟喇，俾多个钟泊车就唔抵！」
「你悭埋悭埋都唔够帮人出整车钱喇！」
「两回事，一个系帮人，一个系唔益大集团！」
「唔同你呢啲花姐讲！」
「咩花姐呀，又帮我改花名！都未问你上次话我系三个五系乜嘢意思？」
「哈哈：三个五！人地要嚟形容𠮶啲高危被炒一族，话佢地中五毕业，年近五十，人工五万。」
「咁关我咩事㖞，我人工得两万三咋！」
「你咪中五毕业，年近五十，五年工作经验啰！咁都俾你揾到工，算你威！」
（下期续）
