KellyChu - 周末元创方免费入场参观 文创无界集结本地品牌 展出300作品 | Executive日记
KellyChu
2024-06-15 02:00 HKT
字體大小
小妹去旅行嘅时候，好钟意买当地文创产品做手信，但原来香港都有好多极具潜力嘅文创品牌，正喺市场不断深耕。由三联文化基金策展嘅「文创无界」，就展出咗分别嚟自9位香港艺术家、设计师及9个香港品牌共约300件艺术作品及文创产品，大家呢个周末可以喺中环元创方The QUBE，免费入场参观。
展览分为4个区域，Zone 1「街画」展示咗林雅仪同埋罗浩光嘅壁画，佢哋透过独特嘅个人风格，创作出充满想像嘅城市空间，令人感受到香港不同文化嘅碰撞。
Zone 2可试玩由INDEX GAME开发嘅元宇宙游戏，当中场景重现昔日九龙城寨，玩家需要逃出城寨以完成游戏，消失咗嘅集体回忆，透过科技和玩味重回现实。同区有设计师阿宽和叶伟青（Felix）嘅art toys，其中阿宽嘅「三脚猫」通过有趣元素吸引小朋友，从而希望向佢哋诉说广东嘅文化故事。
Zone 3就行「中国风」，其中长枱上摆咗许开娇创作嘅「青花瓷蛋糕」，仲有乳猪、寿司同埋薯条汉堡等，后方有多款由林春菊和余婳设计嘅中西合璧旗袍，以及插画家杨德贤创造嘅兵马俑「小秦」，呢个Zone尽显中国古典美学与现代文化嘅交融创新，好华丽。
最后一个Zone系9个香港文创品牌嘅产品，包括原工作室、粤东磁厂、安量彩印制盒、ZXIS、OOObject、罗氏针织、ByLeona、衡建设计及Éphēlis。佢哋将香港曾经嘅传统手工艺及工业技术，用创意升级成为潮物，保存文化同时实践永续发展。
「文创无界」系从深圳文博会香港创意馆移师回港举行嘅展览，策展人梁冠文指，香港馆得到文博会嘅观众赞叹，团队收获意想不到反应，希望香港人透过今次展览，亦可以欣赏到本地优秀艺术作品。佢话，虽然9位设计师有不同风格，但佢哋嘅作品都系「好香港」。
KellyChu
Felix嘅「香港重机」模型。
最Hit
更多文章
