KellyChu - 环地中海赛豪夺7金1银 何诗蓓摩纳哥度假look靓爆镜 | Executive日记
KellyChu
2024-06-06 02:00 HKT
字體大小
香港「女飞鱼」何诗蓓于环地中海游泳系列赛游出好成绩，周日喺最后一站摩纳哥以52秒72于100米自由泳夺冠，连续三站称霸此项目，包揽7金1银。诗蓓仲喺IG分享摩纳哥靓景，一身长裙度假打扮，加上甜美笑容，靓爆镜。Kelly认为，诗蓓正面乐观嘅心态，都系佢成功嘅因素之一。
环地中海游泳系列赛上星期起，先后于法国鲁西永地区卡内、西班牙巴塞隆拿及摩纳哥展开，诗蓓状态大勇，首日已分别喺女子100米蛙泳及主项200米自由泳赢得双金，次日转战100米自由泳，以1秒优势力压荷兰好手夺冠，于法国首站赢得3面金牌。
去到第二站巴塞隆拿，诗蓓继续强势，同样轻松摘下100米及200米自由泳金牌，摩纳哥煞科日，诗蓓先喺200自以近4秒差距抛离对手封后，连续3站夺金，翌日出战100自同样战无不胜，先喺初赛以54秒77晋级，及后再于决赛游出52秒72，缔造三连霸，总结三站豪取7金1银谢幕。
诗蓓心情靓靓，喺IG新reels同网民分享赛后休闲时光，画面先系着泳衣同拎起港队泳帽嘅诗蓓，画风一转换咗套雪纺长裙，喺黄昏时份嘅摩纳哥码头散步。
作为Chanel代言人，诗蓓一向将佢哋嘅产品carry得好好，手拎马卡龙蓝色小废包，穿上黑白尖头高跟鞋，配以招牌甜美笑容示人，好有气质！虽然诗蓓拥有运动员嘅健硕身形，但淑女风打扮对佢嚟讲都无难度，真系又靓女又叻女呀。
KellyChu
更多文章
