KellyChu - 卓永兴落区叹茶探工友 勉「服务一定要好」 | Executive日记
KellyChu
2024-05-02 02:00 HKT
字體大小
昨日系五一劳动节，政务司副司长卓永兴就联同工联会，到旺角嘅伦敦酒楼探访工友。期间卓副司长叹咗个靓茶，并同喺酒楼做咗40年嘅部长闲聊，形容「点心出品好系一回事，服务一定要好，因为我好衰嘅，服务唔好一次就ByeBye！」佢强调，服务系好基本嘅事，「打工仔」一定要有职业道德。小妹觉得司长讲得好有道理，出去食嘢，如果服务好，真系加分好多！
卓副司长同喺酒楼做咗40年嘅谭部长交流时，向对方表示，自己都是第一次深入了解酒楼员工嘅工作，形容「唔系你哋，我哋都无好茶饮」。佢又笑言，酒楼唔好「一笼虾饺有4只」，因为「两公婆食唔到咁多」，最好每笼有几款点心，就可以食多几样，又话饮食业「要谂计吸引多啲银发一族出嚟消费」。
司长又话，社会可能觉得食肆结业潮同北上消费相关，但强调消费者好精明，边度性价比高，就会光顾边度，所以港人要自强不息，强调好地方系「唔愁无客」。而遇到首次来港、来自澳洲珀斯嘅游客，司长仲主动上前打招呼，向对方介绍香港点心！
许正宇车厂探工友
另外，财经事务及库务局局长许正宇昨亦到港铁九龙湾车厂探访工友，期间了解车厂嘅日常车务及维护保养工作。
KellyChu
更多文章
