古星辉 - 5.5G专网推艺术科技应用 | 乜都5G
好多时去睇戏、听音乐会、睇话剧或舞台剧，入场后第一件事，主办机构都会提醒观众熄手提电话，以免妨碍其他观众欣赏表演。但时移世易，当艺术结合科技，例如5.5G专网嘅出现，突破舞台嘅框架，将进一步玩转欣赏艺术文化表演嘅传统习惯。
崭新视觉体验
最近公司就同香港九大专业表演艺团之一嘅国际实验剧团「进念‧二十面体」，计划开创5.5G剧场。
我哋将于11月中喺香港文化中心大剧院，为「进念」建构专网，打造相信系全港，甚至全球首出5.5G黑色话剧《唔讲得》；将使用手机结合舞台剧剧情，演员嘅演出跳出舞台框框，带来崭新视觉体验。
今次去欣赏舞台剧嘅观众，非但唔使熄机，最重要系开住个电话，先可以透过手机实时影像与演员近距离接触。使用5.5G专网，网络可以作分隔大众使用嘅主网，运用独立专网而唔受主网嘅使用所干扰，更好地管理网络资源，充分结合舞台同科技应用嘅崭新沉浸式体验。
5.5G成剧场新元素
听讲以往喺表演场地，电话「收得到」同「收得好」都唔系好大问题，因为主办机构都希望观众专心欣赏表演。但今时今日，由于艺术创作不断演变，科技及多媒体应用日益普及，令高速及低时延嘅可靠连接，成为台、灯、声以外，打破舞台剧传统表演形式嘅基础元素。
作为积极推动艺术科技发展嘅先行者，我哋一向好支持艺团作新尝试。今次更以效能极高、传输速度可高达每秒20吉比特嘅26吉赫毫米波频谱，喺尖沙咀文化中心大剧院，开创崭嘅5.5G艺术科技体验。根据网络同事嘅测试，喺同一地方所得出嘅速度，比平日嘅5G快超过10倍。
《唔讲得》由「进念」联合艺术总监胡恩威改编与执导，著名美术指导奚仲文担任造型设计，著名电影策划、监制及经理人陈善之监制，并由金像奖影后叶童、资深演员黄德斌领衔主演。好期待即场体验呢个创新应用，如何配合精采嘅舞台剧，为观众带来划时代嘅5.5G剧场。
和记电讯香港执行董事及行政总裁
古星辉
