古星辉 - 5G助力中小企数码转型 | 乜都5G
各行各业要进行数码转型都讲咗一段时间，但巿场仍然颇为两极化。试过去餐厅食饭，职员喺门口第一句就话只收电子支付，唔收现金；但走入民生区嘅小店，好多时就只收现金，连电子支付系统都无，更谈不上要做到线上线下融合（OMO）嘅生意模式。呢种情况，估计主要同两样嘢有关：资金有限，技术困难。
依家有好消息喇，政府继以前推出「鼓励及早使用5G技术资助计划」，早前又推出咗「数码转型支援先导计划」，以一对一配对嘅资助形式，重点帮助零售及餐饮业嘅中小企。成功申请资助嘅企业，最多可获5万港元资助，即项目总成本嘅一半。例如舖头自己出5万，政府资助5万，每个项目嘅总成本上限为10万港元，用以进行数码转型，提升营运效率。
先导计划助解决资金技术问题
解决咗资金问题，呢个先导计划亦揾咗业界好多公司针对三个重点，包括电子支付、网上推广，以及客户管理与优惠系统，设计咗各种基础方案配套，以可负担嘅价钱及容易周转嘅月费方式，方便较少接触科技嘅中小企采用，直接解决技术方面嘅痛点。
以我哋为例，公司就为中小企提供5G宽频一站式零售管理方案，助商户追上数码时代嘅新消费模式，做更多生意。方案配合云端支援库存及推广功能，简化销售及后台工作，提高工作效率，仲可以为中小企设计网上商店，或帮助快闪店做短讯流动宣传，吸引目标客户。
据讲，喺整个先导计划已上架嘅基础方案配套约有190个，有啲方案可以为中小企添置自助落单系统、建立公司网站、设计社交媒体专页，甚至支援电子会员计划及电子优惠券等，包罗万有；问题系企业能否踏出第一步。
新闻话截至上个月底，政府先收到300几个申请，而计划本身预期可以帮到最少8000间中小企，实际与期望有好大落差。
最近公司喺上水加强咗5G网络覆盖，我哋嘅「5G特工队」就专程去咗附近嘅「药房街」向商户介绍5G宽频。随着越来越多人北上消费，无论药房，以至零售业及餐饮业整体，都面对着各种挑战。期望有咗5G加持，再加上政府嘅支援，能加快中小企数码转型，一同迈向以数码经济为本嘅新时代。
和记电讯香港执行董事及行政总裁
古星辉
