古星辉 - 5G机械人身负重任 | 乜都5G
后疫情时代加强咗机械人技术喺各行各业嘅应用，大家喺日常生活中，都可能接触过送餐机械人、运输机械人、消毒及清洁机械人，以至机械搜索犬等。就机械人技术会否于未来取代社会上某啲职位，甚至取代人类等哲学性问题，暂且不作讨论，我哋目前见到机械人配合5G应用，的确对大众嘅生活有好大帮助。
最近，公司就「培育」咗一个足智多谋、任劳任怨嘅巡逻机械人；毕业后随即加入一间电力公司，担任「智慧管家」一职，肩负起24小时监察及巡查密闭电缆隧道嘅重任；透过5G高速低时延嘅特性，全面提升喺密闭空间巡查嘅效率，帮助确保供电设备嘅安全及供电可靠性。
5G打造「智慧电缆隧道」
讲咗好多年，5G并非单纯用于上网，5G配合其他技术，加上创新意念，有助提升各行各业嘅营运效率。就好似电缆隧道系输配电网嘅重要部分，喺打风或恶劣天气情况下，更须加强巡逻，确保供电设备安全。
我哋喺电缆隧道安装咗5G接收器，令高速网络讯号能覆盖整条隧道。当大家要逗留喺安全地方嘅时候，「智慧管家」就可以发挥全天候工作嘅优点。佢身上有内置镜头及湿度、气体及温度感应器，可以担任先头部队，探测电缆隧道实况，减低工作人员进入密闭空间工作时所面对嘅风险，同时又可以收集数据，即时以5G传送到控制室作分析之用。
负责「培训」机械人嘅同事话，喺帮助电力公司调校「智慧管家」嘅时候，做咗无数次勘察及评估。据讲，入得去密闭电缆隧道工作嘅都系获授权人士，佢哋要先上堂，考试合格先可以入去做嘢，依家有咗「智慧管家」，由佢入隧道巡逻就更加方便及有弹性。
总括而言，香港推出5G逾4年，好开心见到5G能加促机械人技术嘅应用，处理更多关键任务。随机械人方案嘅使用逐渐成熟，加上人工智能嘅突破性发展，5G机械人配合及AI，有助提升工作效率及补充人手，「前途」可谓无可限量！
和记电讯香港执行董事及行政总裁
古星辉
