古星辉 - 塑造5G智慧校园｜乜都5G

乜都5G

古星辉

2022-11-11 00:00 HKT

阅讀更多

产经专栏

內容

香港推出5G服务已有两年多时间，焦点都集中于提高经济裨益，改善社会民生，今日笔者同大家分享一下5G喺另一层面嘅应用。

以前未有5G时，学界喺资讯科技基础设施嘅重点，大多放喺「光纤到校」同几年前都讲紧嘅「光纤到课室」。一般人嘅错觉，以为「5G智慧校园」所指都系大学同大专院校。我哋尝试从两个层面切入，睇下5G点样打造「智慧校园」，同埋提升电子学习与教学效能。

在校园网络基建方面，时至今日采用5G流动宽频毋须铺线，即可极速于校园建立流动网络，迅速拓展学校嘅网络覆盖，支援更多装置及应用方案。

一场疫情促进咗网上教学嘅发展，将上班一族自携装置（BYOD）返公司嘅习惯延伸至校园。o依家即使恢复部份面授课堂，好多学生都要自备平板电脑、手提电脑或手机上课，对学校频宽嘅需求大增。好多学校已设有内联网，但基于网络安全考虑，若学校能建立自己嘅5G流动网络，就可以将校管或老师所用嘅网络，与供学生使用嘅网络分开，确保大家有充裕频宽及确保网络安全。

在校园5G应用方面，打造智慧校园首先要为学校精心部署5G硬件安排，在配置5G教育方案时，亦要因应个别学校所需而度身设计。
助特殊学校配置方案

公司嘅专业团队，今年分别成功为两间特殊学校申请咗政府资助，帮学校配置咗5G流动宽频同5G机械人方案。学校会为学生提供手带，以防佢哋喺小息或休息期间去咗危险地方，例如学生去咗停车场、校园出入口或楼梯等危险地带，系统就会实时发出警报，一方面以短讯通知老师采取紧急行动，另一方面亦会即时通报机械人，以迅速找到学生嘅准确位置。

5G机械人亦可于校园担任教学大使，老师会因应同学嘅学习需要或兴趣，制订个人化学习教材。喺小息时，当同学和机械人互动，机械人透过手带办认出同学嘅身份，知道佢最钟意嘅学科，电脑荧幕就会用超高速、低时延嘅5G播放相关嘅练习或短片，加强学生自主同个人化学习。

「鼓励及早使用5G技术资助计划」嘅申请将于本年底截止，有兴趣嘅学校要把握机会喇！下星期笔者会同大家介绍一下校园妙用5G科技嘅实例。
和记电讯香港行政总裁
古星辉