古星辉 - 新NOC．新纪元｜乜都5G

乜都5G

古星辉

2022-10-28 00:00 HKT

阅讀更多

产经专栏

內容

上星期公司最新一代嘅NOC正式启用，我哋上下济济一堂，见证网络营运发展迈向新纪元！

「NOC」系电讯网络术语，有人读N．O．C，亦有人简单读「Knock」。NOC嘅全称为Network Operations Centre，即系网络营运中心，系流动网络嘅核心地带，7×24全天候运作，守护数以百万计用户嘅流动通讯服务。真系要好多谢一班喺背后默默付出嘅同事！
NOC数码化提升运作效率

新一代嘅NOC配备人工智能（AI）及大数据系统，以自动化和数码化等先进技术提升运作效率，向网络营运数码转型迈进一大步。

NOC作为营运平台，负责监测网络运作，透过侦测网络、基站、机楼等重要地方嘅传输流量同表现，确保网络运作畅顺。系统喺侦测到问题时，会自动发出警告，再由工程人员处理或外派出勤调查。

有AI加持同大数据帮忙分析之后，系统能有效将警告嘅数目大幅压减（alarm compression），又识得透过应用程式自动派单畀同事，令我哋能精准调派人手，迅速处理同解决网络问题，将对用户嘅影响减到最低。道理就好似减少火警误鸣，等消防员可以专心救人救火一样。先进嘅NOC系统，仲可以实时知道受影响基站嘅数目、现场实况，以及进一步分析后续需要跟进嘅项目。

NOC仲有一个服务质素系统，可以监测漫游数据流量及网络表现，资料不停更新。好似近排日本开关，再加上0+3政策出台，而另一方面又有唔少人移民英国，喺NOC就见到漫游数据流量排行榜，日本同英国稳占头十大。各种资料有助确保用紧我哋漫游SIM卡用户喺当地嘅上网体验。

NOC不断演化，新一代嘅NOC采纳数码维护（digital maintenance）同数据统一平台（unified platform），结合自动化同数码化，大大提升营运效率。NOC所记录嘅一啲大数据，例如客户使用模式，更可以帮助业务营运嘅同事，主动出击，推出更切合唔同用户所需嘅个人化通讯服务，令网络服务与商业营运及客户服务更环环相扣。

当大家可能仲犹豫紧几时升级5G计划嘅时候，其实我哋已经开始未雨绸缪，为未来5至10年将会出现嘅5.5G同6G做好准备！
和记电讯香港行政总裁
古星辉