古星辉 - 5G机惨被「大材小用」？｜乜都5G

乜都5G

古星辉

2022-04-22 00:00 HKT

阅讀更多

产经专栏

內容

早前政府发放消费券，听讲唔少人都打算换新手机，特别系最近有新型号手机推出，而旗舰机又出咗新颜色，可能造就另一个换机潮。不过，巿场上，有唔少人买咗5G手机，但系又未升级月费计划，造成5G机用4G plan嘅现象。

5G服务喺香港推出两周年，香港去年9月底嘅5G客户人数为220万名，以全港人口计渗透率约三成，成绩好唔错。一般来讲，追求科技、讲求速度嘅科技达人，佢哋喺好早期就已经唔理价钱率先采用5G，呢批系5G机5G plan嘅用家。到科技慢慢普及，巿场就会出现一批愿意换5G机，但觉得毋须用5G plan嘅客户。电讯商一直各出奇谋，好希望吸纳呢一班客户，鼓励佢哋升级。

5G手机用4G plan唔系唔得，而系好似你揸住架超级跑车，但系行嚟行去都系啲横街窄巷一样，浪费咗部靓车；又或者好似手持头等车票，但坐咗去普通车卡一样，嘥咗部有5G功能嘅手机；而且随著时间一日一日过去，新机只会不断耗损。综观而言，用家往往有两大谬误：
谬误一：用5G好嘥电

有唔少客户即使买咗新机，都会沿用4G plan。事实系好多机王已经出到第二、三代5G机，呢啲新机嘅晶片设计同埋电池容量都有好大进步，用电量其实同4G机差唔多。
谬误二：5G plan好贵

事实系，电讯商已特别因应5G高数据用量习惯而制定咗合适嘅5G plan。一般嚟讲，5G数据用量系4G用量嘅一至两倍。消费者委员会旧年年底做咗个「5G流动电话服务月费计划调查」，比较咗80几个月费计划，以100GB为例，月费在298元起。有啲入门计划（不少于30GB）仲去到200元以下，并与4G相同月费嘅计划具有更多嘅数据量。

由3G过渡至4G要10年，估计由4G过渡至5G嘅时间会快好多，因为5G生态系统发展良好，巿场上又有好多唔同档次嘅5G手机俾用家选择。5G时代已经来临，究竟720P同4K嘅串流视频画质同清晰度、开启视像通话或Zoom嘅时延及流畅度，系咪真系无乜分别？如果你买咗5G手机就唔好等喇，唔好浪费咗部新电话，快啲升级5G计划亲自感受体验一下。
和记电讯香港执行董事及行政总裁
古星辉