古星辉 - 5G智能抗疫机械人｜乜都5G

古星辉

2022-03-18 00:00 HKT

阅讀更多

內容

5G网络蕴藏无限可能，除咗可以喺疫情期间帮助大家同外界保持联系，仲可以纾缓店舖人手不足嘅情况。最近大家喺超市扫货，可能都曾经同5G智能抗疫机械人有过一面之缘。

最新嘅5G智能抗疫机械人嘅足迹遍及港九新界，佢哋嘅主要工作包括以5G自动导航，巡逻同支援超市消毒，协助打造安全方便嘅购物环境，保障大家嘅健康。消完毒佢仲可以为客户推介最hit产品，亦可以提供仿真人对答功能，带埋路都仲得，可谓多才多艺！
具自动避障功能

5G智能抗疫机械人身上配有10.1吋嘅轻触式屏幕，能够独立连接至电讯商嘅5G网络，方便店长遥距输入指令，毋须倚赖公共WiFi或店内其他网络，既唔怕机械人嘅运作受干扰，亦唔会因为同零售系统共用网络而影响系统资料嘅安全。呢啲机械人仲设有自动避障功能，令客户购物更安心自在，同时减低店舖员工受感染嘅机会。喺疫情期间，唔少行业都面对人手不足嘅情况，有咗5G机械人代劳，商户可以更有效安排人力资源。

其实巿场对机械人嘅应用都有所认识，特别系有咗5G网络后，因为速度快、时延低，机械人嘅应用层面更阔更广。相信今次疫情更加系5G机械人普及同一展所长嘅契机。有报告预期，环球机械人巿场嘅价值会由2020年嘅61亿美元，上升至2025年嘅230亿美元，由此可见机械人巿场嘅潜力庞大，不容忽视！

今时今日，机械人方案已经唔系大公司、大商场嘅专利，笔者喺茶餐厅都见过有机械人送餐。目前，有本地电讯商已能够为中小企极速设计简便嘅机械人方案，方便商户喺疫情期间运筹帷幄。巿场上亦有多元化嘅机械人方案，适用于中小企及不同行业，帮助客户保持营运效率。机械人方案嘅收费模式好有弹性，既有月费租用计划，又有独立销售两种模式。由客户确认定单至安排机械人落舖开工，只需短短一个星期就搞掂晒！相信大家好快就会喺社区见到更多5G机械人同我哋一齐抗疫！
和记电讯香港行政总裁
古星辉