乜都5G｜「无感出入」 5G智慧泊车

乜都5G

古星辉

2022-01-14 00:00 HKT

阅讀更多

产经专栏

內容

每逢长假期，停车场都例必大排长龙，而呢个或多或少同出入闸有关，每部车出入停几秒，好快就出现车龙。5G有好多应用，绝对能有效提升智能交通体验，无论揸车定泊车，5G超高速、极低时延嘅优点都会帮到手，真系冇得输。

最新嘅《施政报告》就曾经引述一间国际市场调查机构，话香港嘅5G覆盖同稳定性分别排行全球第一及第二，为好多创新5G应用和方案提供咗有利条件。
简化流程加快疏导车龙

先唔讲车联网同智慧出行，因为始终牵涉好多道路基建，亦要等5G独立网络架构（SA）发展成熟先有条件。简简单单只讲智慧泊车，「无感出入」5G停车场嘅泊车方案，已经可以大大加快商场同办公大楼嘅人流同车流。喺港岛同九龙，已经陆续有室内停车场采用咗5G智慧泊车方案，简化出入闸嘅流程。

（一）高清影像辨识：唔使停车、唔使开窗，亦唔使拍卡。当汽车到达停车场闸口，高清镜头透过5G超高速、低时延嘅传输，极速同云端嘅数据库沟通，瞬间辨识已登记嘅车牌号码，跟住自动开关闸，畅顺无阻，是为「无感出入」。

（二）结合流动支付：唔使人肉畀钱，只要用相关嘅应用程式，或者喺网络登记或预设好信用卡，出闸即可自动缴费。我亲身试过「无感支付」，真系爽、快、方便。

为咗提升香港嘅智能交通体验，各个持份者都好努力。其实「无感出入」5G泊车方案嘅应用喺户外更见优势，例如喺露天停车场（俗称烂地停车场），特别系喺偏远地方𠮶啲，有电力供应但未必有宽频，呢个时候5G就可以发挥作用，安装不同类型嘅智慧停车场方案，既节省人手，亦方便驾驶人士，真系商机庞大。

5G嘅应用层面广阔，唔同场景和唔同行业都有独特嘅创新应用，而喺疫情嘅影响下，好多企业都知道数码转型同先进技术对提升营运效率的好处。政府去年七月宣布将「鼓励及早使用5G技术资助计划」加码，并将申请期延期至今年七月底，有兴趣嘅企业要把握机会了。
和记电讯香港行政总裁
古星辉