乜都5G——NFT是Art Tech推手

乜都5G

古星辉

2021-12-24 00:00 HKT

阅讀更多

产经专栏

內容

　　近几个月大家见得最多嘅三个英文字，好可能系NFT（Non-Fungible Token，非同质化代币），根据Google Trend嘅统计，全球喺Google搜寻引擎输入NFT嘅次数，由今年七月开始几乎未少过，自10月开始升势更见强劲。睇完网上趋势再睇媒体，呢个字喺报章嘅曝光率相当惊人，由新闻、金融、娱乐、体育以至文化版都会见到，今年最潮最Hit嘅字，NFT一定有份。
　　到底边啲地区嘅人最留意NFT？Google Trend嘅统计仲有提及按搜寻次数计算，边个地区嘅人对NFT最有兴趣，中国、新加坡同中国香港排喺头三位，亦即系话呢三个地方嘅网民特别关心NFT。
中星港网民关注NFT
　　讲完一堆数字，NFT推动咗数码艺术嘅产权认证及资产交易，我会将佢界定为Art Tech（艺术科技）嘅其中一个重要「推手」。政府喺2020年嘅特区《施政报告》中已经预告会支持Art Tech发展，全靠5G嘅出现加速两者结合，令艺术作品透过崭新方式呈现喺观众眼前，亦都衍生咗热爆全球嘅NFT。相信大家都仲记得，艺术家Bepple嘅作品《每一天：前5000天》喺今年三月嘅拍卖中，利用NFT模式以约6900万美元出售，消息震撼全球；到咗今日，一个短讯、一格菲林，甚至一粒音符都可以用NFT方式拍卖。
　　我哋做电讯业触觉最紧要，所以早就察觉到NFT嘅潜力，今年夏天率先喺1881举办咗一个以星空为主题嘅活动，等公众透过5G网络制作自己嘅NFT，呢次发现香港人对NFT嘅接受程度令我哋喜出望外。最近我哋一班年轻同事喺圣诞新年搞一场NFT Art Show，喺旗舰店展出多位来自法国及本土艺术家嘅数码及实体作品，观众更可以即时去Opensea购买呢啲数码产品嘅NFT版本，另外亦有啲加人AR（扩增实境）效果嘅Tee，用手机对住Tee上面嘅图案就会有特别效果，仲设计咗三款IG滤镜影靓相，成功吸引到好多潮人捧场。呢个活动免费入场，大家圣诞新年经过铜锣湾，记得去打卡留念。
　　2021年潮语，我投NFT一票！
和记电讯香港行政总裁
古星辉