头条戏场 - 《我在这里等你》 好彩有刘俊谦 | 头条戏场
头条戏场
2024-05-24 02:00 HKT
字體大小
一套《九龙城寨之围城》令到中港台多咗好多刘俊谦老婆，有「刘太关注组」我会秒速加入。《我在这里等你》因为有佢所以狗冲入场，结论系范少勋好靓，刘俊谦更靓，台湾风景激靓，有大海有烟花有张国荣嘅歌，睇剧照同预告都暗示两位男角有大量暧昧感情，以为剧种是俊男BL，满心欢喜可以疯狂FF，人生果然有好多遗憾，抱住睇靓仔揽锡的腐女们应该会好失望。
（已上映） 撰文：廖思慧
刘俊谦饰演失意的香港作家天宇，因为作品涉抄袭被狠批而飞去台北避静，继而在夜场被灌酒，幸获当地古惑仔阿翔（范少勋饰）执返屋企。因为台仔讲嘢冇句真，又吓吓讲钱，港仔一脸厌恶，但因为台仔可以带路去传言可直达天堂的鲸逝湾，唔熟路加上被偷银包的港仔万般不愿只能死跟。两人沿途经历大量枝节，由单方面讨厌到互相慰藉，最后发现两人原来有段跨越10年的奇幻缘份。
纯睇靓仔可入场
观影感觉好特别，片中有大量台湾好山好水画面，虽然冇特别交待两位男角的性向，但有壁咚，又有非常多的不经意互望，加上有唔少晒body场口， 又浸水又冲凉，期待靓景下两人会更进一步，但睇到尾先发现所有暧昧都点到即止，你一直以为睇紧一套青春BL电影，近尾声先恍然大悟，原来是一套玩平行时空的奇幻电影。
不过好可惜，编导讲故事能力麻麻，剪接亦好混乱，全片重点的时空穿梭睇到怀疑人生，两男相遇力度亦好薄弱，全靠两位男角撑起成套戏，特别是刘俊谦，由被屈有冤无路诉，到逐渐释放自己至勇敢回港，全靠佢不断将观众拉返入局，认真辛苦晒。
头条戏场
电影当然亦有优点，就系画面好有美感，不经意偷望对方的眼神最好睇。
旅程中两人路经有瀑布的湖泊，当然唔好浪费，至于只狗就充满功能性。
电影前半段有好多呢类暧昧场口，拍得靓嘅，睇到好兴奋。
阿翔好活泼又乜都够胆讲，天宇逐渐被融化。
阿翔的哎吔阿妹夏夏（詹子萱饰）负责满足男观众。
全片冇明言两人性取向，但以行动话畀观众知。
社工陈俞心（林予晞饰）认识童年阿翔，知佢跟天宇的秘密关系。
更多文章
