效力TVB13年月入几千欠一身债陈国峰为养家收5位数打拳

头条日报-娱乐

更新时间：00:00 2023-05-25 HKT
发布时间：00:00 2023-05-25 HKT

2010年参加《超级巨声2》入行的陈国峰（Penny），前年7月疫情期间，跟TVB由经理人合约改为基本艺员约，因为工作量唔多，每月收入只得几千蚊，一度要向圈外朋友借6位数（超过10万）应急养家，辛苦挨咗年几，趁下月约满决意离巢。卖身13年，Penny换来一身债，但他无怨无悔：「我赚到嘅系经验，有钱都买唔到嘅。」
采访：方骞平
陈国峰将于下月13日出战亚洲心动娱乐（AMM）举辨的《宇宙荣耀搏击拳赛》，40岁的Penny以参赛拳手身份，挑战仅22岁，高头大马的职业篮球员兼篮球教练陈耀燐，打明星赛决一高下。
擂台上豁出去真打

8年前，Penny为操fit身形而练拳，跟志同道合嘅罗孝勇、谢东闵一齐玩。他自爆今次打拳赛，除机缘巧合获朋友推荐外，绝对系为咗份酬劳：「见有5位数（万元）出赛费，咪当系接份有钱job，又可以做吓运动啰，o依家我豁咗出去，上到擂台就嚟真，连样都唔理，就算硬食两吓，都要竭尽所能反击返对手4拳，就算输都唔好输得咁肉酸。」问到会否好似林作咁采取逃跑战术？Penny却力撑对方：「擂台上千变万化系要打技术，逃跑都系策略，也需要气力。」
周身瘀伤老婆担心

40岁的Penny撑林作因为感受到练拳之痛，「大家都知我乜年纪，平日只系踢波及做gym，冇做开剧烈运动，最初用死力对打分几钟，已经打到『爆呔』（冇晒气），o依家协调到呼吸，可持续打3分钟。」Penny育有2子，圈外老婆黄思雅（Wing）会否担心他出赛？他轻松说：「佢表面话唔惊，我唔知佢内心点谂，不过，佢有时见我操完拳周身瘀伤，返到屋企成个人散晒，就会有啲担心问『你得唔得㗎？』另外我唔建议年老妈妈捧场，始终身体发肤受诸父母，但老人家坚持一定会到，暂时未知囝囝会唔会嚟，咁都好嘅，希望借此以身作则，唔好做一样后悔嘅事，有机会就要好好把握，做啲值得回忆嘅事。」
冇兴趣参加《中年2》

提到第5波疫情严峻时，Penny两公婆手停口停，经济拮据，父亲又因病去世，雪上加霜，好彩有「兄弟帮」老友Bob（林盛斌）等施援手，同时，他坦言有向圈外朋友借6位数应急，目前仍未有能力还债。当问到可有后悔卖身TVB 13年？他承认在TVB多年，有段时间失望及徬徨过：「但赚咗好多人生、工作、演戏经验，有钱都买唔到。我相信人要向前行，唔可以停留太耐，去另一个地方，总会有出头天，就算离巢都唔可惜。」Penny曾下定决心，40岁要做一件有意义嘅事，「加上拳赛后翌日同TVB完约，好似上天畀我一个新开始，将来仍然会keep住唱歌，接吓商演，边做健身教练去寻找机会。」

另外，两年前Penny曾报名参加《声生不息》但被指年纪大，报名被拒，问他会否参加《中年好声音2》圆歌星梦？他有所保留，尴尬婉拒说：「机会留返畀外面嘅年轻人，等佢哋见识吓TVB系点，唔使预我喇……」