爆笑讲家事指老婆系世纪骗案陈柏宇呻符晓薇喺屋企都话冇带信用卡

头条日报-娱乐

更新时间：00:00 2022-12-22 HKT
发布时间：00:00 2022-12-22 HKT

陈柏宇（Jason）将于明年2月feat.「九龙摇摆俱乐部」举行演唱会，所以今年圣诞同新年都未能尽兴咁玩，不过怀孕5个多月太太符晓薇（Leanne）就踢爆，其实老公完全没节日感，唔钟意惊喜亦零浪漫。Jason反而投诉老婆婚前婚后两个样是世纪骗案，更追问老婆点解喺屋企都话冇带信用卡，两人爆笑讲家事。另外，Leanne更公开怀第二胎情况。
采访：杜杜形象︰Kay Pang 发型︰Aki@The Atti 化妆︰Jessica Chan
服装︰mm6 Masion Margiela @ithk 场地︰The Goodies Hub

Jason今次演唱会有别于以往的演唱会模式，首次连同超过40人大乐团及乐队共同演出，「今次个骚音乐性质系会强啲，想以唔同方法去做骚，我系好享受同人哋一齐合作嘅感觉，今次所有歌曲偏向管弦乐嘅方向去出发，但唔系请队管弦队嚟嘅感觉，因为想pop多啲，采用音乐嘅元素，揾唔同类型风格嘅乐手返嚟演奏，可以有啲唔同火花出现。」

由于演唱会在2月4日举行，Jason预了普天同庆的圣诞等节日都要养声，「心态上冇得玩，新年玩得太尽兴对声又唔好，我都谂紧做之前，睇吓妈妈（跟囡囡称呼太太）同Abigail点样可以配合到我，有机会都想佢哋去staycation，去番几日等我可以有多啲时间喺屋企休养同埋集中多啲，Abigail喺度我又唔忍心佢嗌我唔应佢。」原来之前Jason开骚，已经测试过囡囡会有这情况，「如果我唔讲嘢，佢会叫我『讲嘢啦爸爸你讲嘢啦』，我做口形，跟住佢扮我做口形，佢配合唔到，佢未明呀！」
送礼物唔钟意有惊喜

不过Leanne早已习惯一个冇节日感的老公，因拍拖时Jason连圣诞礼物已讲明唔钟意有惊喜，「我第一年送完嘢畀佢，佢同我讲『其实我哋唔使做呢啲嘢，如果我要乜嘢或者你想要乜嘢直接讲，唔使买到啲唔钟意嘅嘢』，佢系好唔钟意有surprise，好唔浪漫。」讲到买礼物，Jason突然呻，「好揾笨，我o依家唔讲圣诞节我要啲咩礼物嘅原因，系无论我讲咩，啲钱都系喺个pool攞出嚟。」Leanne狂笑，Jason继续爆料，「妈妈好好笑，佢有一个坚持系点都会碌我畀佢𠮶张卡，但系我谂其实你碌边张卡，你啲钱都系喺同一个source度嚟。」Leanne解释分别是她的钱还是Jason的钱，但Jason忍唔住再话，「但好笑𠮶次你话『𠮶度唔收AE，爸爸你畀你张VISA我』，你冇VISA咩，冇带？屋企嚟㗎㖞，屋企都可以冇带？！哈哈！」

Leanne见Jason爆家事爆得咁开心，索性玩埋自爆，「我开头拍拖唔系咁，一结完婚佢话系骗案嚟，𠮶时好多嘢都系我畀钱，譬如去旅行𠮶啲我多数会畀钱，我𠮶时有做嘢，𠮶阵好钟意返工嘛，哈哈！」Jason笑指Leanne婚前婚后两个样，「佢话好钟意返工，结咗婚生咗小朋友都希望可以继续返工，但系佢结婚后有日同我讲『我唔想返工』，真系世纪骗案，呢个唔系要求嚟，系知会同通知。」
揾堪舆学家帮BB改名

虽然送礼物方面，Jason对囡囡Abigail总算例外，但他跟Leanne承认现在小朋友经常有礼物收，「以前啲小朋友去人哋生日party，系生日𠮶个收礼物，o依家𠮶啲生日party，系个个小朋友都要有礼物。」所以生细女时，两人都不打算跟潮流代细妹送礼物给姐姐，令姐姐不会呷醋。Jason解释：「成日睇啱嘢就买畀佢，佢长期收紧礼物，同埋你送份礼物畀佢，佢唔会记住呢份礼物，以后都唔呷醋㗎嘛！」

Leanne今胎同样佗B女，但比上胎辛苦，开头呕足3个月，加上上次经验肥人唔肥胎，所以冇再丧食，体重亦未有增加太多，「今次重咗廿几磅，可能未怀孕前好瘦，减肥唔够100磅，反而今次个BB系大只过Abigail，医生话只脚长，我就即系谂『咁咪唔系佢（Jason）嘅』，佢即刻话佢对脚长。」Jason解释自己身材优点，「系黄金比例。」之后Jason再发表伟论，「我唔明keep超声波相嘅必要啰！其实你上网个个超声波嘅相都系一样。」至于为BB改名，两人亦已计划好揾堪舆学家帮手，Leanne说：「始终我哋中文字穷，又要拼埋好听。」Jason就补充，「何乐而不为，你又可以配合埋个时辰八字，宁可信其有，又唔会有坏嘅。」