直击韩马利闹爆林夏薇生仔冇屎忽周嘉洛险被沙包掟到婉拒对方道歉

头条日报-娱乐

更新时间：00:00 2022-11-22 HKT
发布时间：00:00 2022-11-22 HKT

TVB日前举行下年节目巡礼，晒冷式节目介绍梗有一套啱你心水，当中最厉害系27岁力捧小生周嘉洛，一人孭三套剧，计比例多过好多视帝。虽然极速上位中，但周小生无话招招积积，依旧同工作人员打成一片。日前，周小生同林夏薇喺西贡为新剧《宠爱Pet Pet》拍外景，见佢玩鬼工作人员，唔使埋位就坐石壆髀擘擘，好似隔篱屋啲哥哥咁，咁鬼亲民，抵佢有运行嘅。采访：金泰亨

周嘉洛下年被TVB委以重任，孭飞剧集计有《宠爱Pet Pet》、《罗密欧与祝英台》及《痞子殿下2》，因为形象健康又入屋，有指佢系马国明接班人，咁佢精灵过马明嘅，希望佢唔会好似马生咁，要等咁多年先拎视帝啦。
韩马利闹到成条街都听到

讲返探班，当日星期日，阳光普照仲几热O添，周嘉洛、林夏薇、韩马利及杨证桦在旧墟附近拍外景，剧情讲述小贩韩马利疑似呃钱，周嘉洛同林夏薇同佢理论，但换来喝骂，「你两个虾一个，生仔冇屎忽㗎！」男方疑似想息事宁人被林夏薇叫停，称唔可以助长骗徒，韩马利即刻爆seed，「你够胆讲多次？」记者都吓一吓，然后杨证桦现身做正义嘅事，指证对方呃人又阻街，仲话报警O添。

因为演员表现好，两take收货，然后再等拍另一场口。等候期间，周嘉洛同林夏薇都几好倾，又互相推吓，仲帮手执好地摊啲公仔。有工作人员掉沙包落地，因为掉正周嘉洛身边所以讲咗声sorry，换嚟周嘉洛讲笑式无情应对，「傻啦，你乜都冇做到已经讲sorry喇，我嬲你㗎。」之后仲好随意咁坐喺石壆等埋位，性格相当OK㖞。