星马泰生日Trip十亿男友操刀影靓相陈庭欣公开私藏照360度靓Body任睇

头条日报-娱乐

更新时间：00:00 2022-10-29 HKT
发布时间：00:00 2022-10-29 HKT

2010年港姐冠军，陈庭欣（Toby）keep住33C靓body，次次出埠都影泳衣相派福利。月前，陈庭欣35岁生日，10亿男友杨振源（Benny）精心策划一个星马泰豪华旅程，作为生日礼物o氹女友开心。今次Benny唔只包机票食宿仲包埋影相，男友视角下，Toby晒尽滑溜「蜜桃胸」，以及冇半滴多余脂肪的靓figure！记者赞Benny影得好，Toby就唔多认同：「Benny影相真系麻麻地，系靠蓝天白云搭够。」采访：方骞平

陈庭欣跟男友拍拖4年愈爱愈高调，之前趁东南亚开关，Toby就带住7套sponsor靓泳衣同男友出走泰国布吉岛、大马浮罗交怡及新加坡，除口罩疯狂同阳光及海滩玩游戏，Benny仲做埋私人摄影师帮Toby影靓靓写真，Toby就精挑多张靓相畀《星岛头条》读者，更性感嘅当然私藏慢慢欣赏。
投诉男友影相麻麻

Toby化身model，任由男友360度，由上至下拍摄唯美写真，其中Toby穿上火红色三点式泳衣，置身泳池边轻托太阳眼镜的靓相，白雪雪「蜜桃胸」非常bling bling，Toby表示：「其实今次唔系特登去影写真集，每款泳衣都系影咗两、三张，好快就影完，因为我想enjoy吓个环境。」她又带笑「投诉」男友：「有两个香港朋友一齐去𠮶几日影啲相会靓啲，Benny影啲相真系麻麻哋，不过，𠮶度阳光与海滩好靓，就算乱咁影，天色都可以搭够，我最钟意系望住个海。」
非常合拍感情大增

对于被封「性感女神」，Toby坦言对身形有一定要求：「因为今次食得太多，去完呢个trip唔fit喇，要加操。」她承认疫情下冇得去gym room，又要戴口罩做运动，个人会懒咗，又提到随住年纪渐大，每日至少花半小时做运动，好彩身形仲keep得住。

Benny花心思为Toby安排生日trip，如在布吉岛的resort体验瑜伽及冥想，又准备玫瑰花及生日大餐，sweet到爆灯！问到系咪好事近？Toby坦言两人在此行有增进感情：「因为大家都玩得开心，我哋都钟意水上活动及晒太阳，但就唔系高调放闪，总之系正常拍拖咁，po吓旅行开心相。」Toby又笑言每年都会传婚讯，她强调：「都唔系，真系好奇怪。」