带埋狗仔兔兔行街庞景峰激嬲女友快速o氹返

头条日报-娱乐

更新时间：00:00 2022-07-12 HKT
发布时间：00:00 2022-07-12 HKT

31岁的庞景峰（Andrew）入行好耐，但要你讲佢拍过乜做过乜，估计除咗佢阿妈郭秀云之外，应该冇人讲得出，但提到佢啲花边新闻，大家应该好有印象，例如交过好多女朋友同埋改姓。家阵Andrew同拍拖1年半嘅网红女友Hailey经常出双入对，孖住出活动，出po都会见到一家「三口」，即系佢同女友及柴犬「梳打」，之前就见到佢哋一家人加埋兔兔去咗铜锣湾，当日男方仲激嬲女友O添。采访：娱乐组

去年8月，Andrew曾推出3首自编自导自演嘅MV，制作费更高达7位数，当时佢仲透露筹备紧一部动作大电影，佢好有心呀，希望令香港嘅动作电影更上一层楼，香港电影业真系好彩有佢咋。
女友好易o氹

日前傍晚，Andrew同女友现身利园一期，当时地下有宠物用品展览，仲喺一角设位置供主人及宠物影靓相，Andrew同女友坐喺长椅，「梳打」就坐喺旁边嘅宠物位，驻场摄影师影完，Andrew交出手机畀工作人员帮佢哋影，然后轮到Andrew帮女友影，望真啲，原来女友仲抱咗只兔兔出嚟，由于同佢件衫撞晒色，所以发现唔到。影完相，Andrew抱住狗狗及拖住女友去景隆街买兔仔粮，两人入咗间宠物用品店放低兔兔再行咗一阵，Andrew同女友疑似嘈咗两句，女方行离店舖，Andrew即步出再绕实女友手o氹返，之后喺附近行咗阵，再返回宠物用品店拎返兔兔先call车离开。