Jacky哥 - 有种职业叫「能源医生」？｜企业热话

头条日报-专栏

更新时间：00:00 2022-05-06 HKT
发布时间：00:00 2022-05-06 HKT

真系有呢种职业！小弟睇《能源百科》面书专页见到喺燃气业工作超过30年嘅资深工程师、港华智慧能源技术部高级副总裁伍宇铿Humphrey讲，「能源医生」呢个名系佢同事帮佢呢份工改嘅。

咁到底呢位医生做咩？Humphrey话30多年前，佢毕业无耐就加入煤气公司担任助理工程师。当年虽然未有「能源医生」嘅概念，但世界一直在淘汰一啲旧式能源同工具。当年香港有唔少人，尤其系茶餐厅、大酒楼等商户，用紧旧式「油渣炉」。「油渣」即系柴油，系一种价格极度便宜，但含有极多杂质嘅燃料。油渣炉具有一定危险性，而且油烟多，当时有唔少大型酒楼厨房设喺地下或一楼，就需要接驳一条长长嘅烟囱到大厦顶楼，去排走废气。当时佢返呢份工嘅第一个任务，就系挨家挨户联络旧式油渣炉嘅工商业用户，协助佢哋转用相对安全同干净嘅煤气煮食炉。过程中要帮佢哋改装现有炉具，去配合返管道煤气系统，成个过程同做手术十分相似。当时嘅工作，就系「能源医生」嘅雏型。

30年后：减碳如减肥

30年后嘅今天，世界各国都纷纷设定减碳目标，希望减低全球升温嘅速度。而精明选择清洁能源同相应技术，就变得十分重要。而家Humphrey会经常往来内地不同城市，尤其系一啲大型工业园区，帮园区同公司做「能源体检」同「减碳大计」。就好似帮需要减肥嘅病人做Body Check，检视佢哋饮食同生活习惯有咩问题，然后开一张药方或「减重To-do-list」，陪佢逐步去落实，最终达至健康体重。

要帮内地工厂减碳，佢哋都试过几种不同嘅方法，譬如：善用各个园区不同嘅天然资源，如风、光、地热等；或者喺工业园区嘅屋顶安装太阳能光伏板，一般可以令超过10%的电力转为由太阳能供应。又或者以天然气替代煤、油等的化石燃料，不但能提高能源利用效率，也能降低碳与各种污染物的排放。亦可以将电厂、钢铁厂等的余热回收利用，产生蒸汽、热水或空调，自用或供应俾周边客户，降低园区嘅能源消耗。甚至利用智慧平台为客户嘅厂房数位化，以减低相关系统嘅运行成本。

所以呢位「能源医生」就系要细致咁去审视能源运用，谂下点样改善生活之余，亦尽量减低对地球嘅伤害。喺Humphrey身上学到呢啲新知识，大家真系要跟住follow「能源百科」呢个面书专页！
Jacky哥