高空卖命拍《飞虎3》吴卓羲欢迎菊梓乔随时上门拎物资

头条日报-娱乐

更新时间：00:00 2022-03-23 HKT
发布时间：00:00 2022-03-23 HKT

TVB剧集《飞虎3壮志英雄》剧情高潮迭起，剧中飞车、跳楼、肉搏、爬天秤等多个亡命动作，都由42岁的吴卓羲（Ron）亲身上阵，相当卖命。手持40只名表、7架名车、3层figure博物馆及逾半亿物业嘅Ron接受《头条日报》访问时，坦言系惊住拍，但疫情下更惊冇饭食，所以o依家努力做嘢先，感情上未有好消息公布，但又走漏少少口风，坦言屋企添置唔少抗疫物资，欢迎绯闻女友菊梓乔（Hana）随时上去屋企拎嚟用。最新《东周刊》拍摄到Hana驾车到吴卓羲位于深井的寓所，疑似过夜享受二人世界，应该拎咗唔少物资㖞。
吴卓羲于新剧《飞虎3》演飞虎队员高子乐有好大发挥，佢话有好多难忘场口。他忆述说：「有场追捕疑犯戏，我喺2楼停车场跳落货车顶，除咗位置要夹得啱外，TVB个楼层仲系特别高，相等于4楼嘅高度，𠮶朝7点几化完妆，武指就话第一个镜头就要跳落去，我反应系讲真定讲笑呀？虽然武指话有替身，但佢补充一句话『但自己拍出嚟靓啲㖞！』咁样做唔做呀？至于另一场爬上10多层楼高嘅天秤做狙击手，由于天秤系通窿嘅，加上拍摄时落紧雨，我惊到只可以向前望。」
乜都惊就冇人揾你

讲起都惊，拍摄时当然更恐怖，阿Ron坦承：「惊都冇法，冇饭食仲惊呀！左拣右拣动作戏，人哋唔揾你咪变相冇饭食？所以《飞虎4》都有预埋我。」对于第8次跟黄宗泽（Bosco）合作，Ron笑言最紧要公司唔怕闷，「不过，如果下套戏讲我同Bosco喺商场上大斗法都几吸引，仲可以偷懒，唔使打。」另外，他又赞姚子羚较之前进步好多，是个好演员；而蔡思贝就好聪明，理解能力好高。
有钱靓仔女仔怕怕

另外，问到绯闻女友菊梓乔（Hana）对他演技又有何评价？阿Ron笑晒口说：「佢话好好睇啩……唔系点样讲啫？佢凭乜批评我演技呀？！」Ron一讲到Hana就口窒窒，记者笑佢好怕女方，Ron如小朋友般反驳，「我怕佢乜呀！」Ron又抵死说系Hana嘅fans，却又被记者考起，唱唔出她的歌，仲死撑：「你叫返佢唱首我嘅歌，睇佢识唔识？」对于Hana冇否认两人恋情，Ron同样不置可否：「随缘喇。」听毕记者赞佢靓仔有钱冇得输，Ron即有感而发，「有时有钱又靓仔仲惨，个女仔更加冇安全感，好多时会胡思乱想。」记者叫他畀啲诚意，他即说：「尽力啦！其实我好耐冇绯闻，咁嘅年纪仲花弗咩！唉……大家关注疫情先，关注吓超市有冇冻肉及消毒用品买，我呢啲花边嘢放埋一边，冇人想关注。」他又自爆家中添置咗大量抗疫物资，问到会否提供畀Hana？他风骚笑说：「随时上嚟我屋企攞。」及后他即补多句：「Bosco、三哥苗侨伟，边个嚟攞都得，我大把。」
采访：方骞平
化妆：Marsha Ma 发型：Ian Wong 助理：Nina Shum