夫妻恩爱
■Marie同薛嘉麟结婚10年，Marie有时都会向老公撒娇，呢日离开超市都主动拖老公。

薛嘉麟戴两个口罩陪老婆入货诸葛紫岐同囝囝除罩冒险食雪糕

头条日报-娱乐

更新时间：00:00 2022-03-17 HKT
发布时间：00:00 2022-03-17 HKT

诸葛紫岐（Marie）自2012年嫁畀Neway二公子薛嘉麟后育有两子，一直过住阔太生活。不过近年受几波疫情影响，老公啲卡拉OK生意都几湿滞，不过睇嚟对两公婆嘅生活冇太大影响。日前《头条日报》记者撞到成身新款名牌的Marie与老公带同就快3岁嘅细仔薛华舜（Anderson）喺铜锣湾行超市，仲有两个工人跟住，加埋专车接送，依然好有阔太风范，见小朋友买咗雪糕即刻除罩食，Marie又忍唔住除罩食两啖，小心啲好㖞。采访：梁志明

薛嘉麟跟实老婆买嘢，都系行吓睇吓，买咩其实都系老婆话晒事。Marie呢日主攻啲即食嘢，好似面包、即食燕麦片、壳物片、蛋糕等，仲买埋日本拉面礼盒，应该都系食咗当去咗日本啦！而薛嘉麟就买雪糕畀个仔，又买杯嘢饮畀老婆。Marie平时凑开两个小朋友，有晒经验，带得两个工人出街一定有原因嘅，之唔系派个工人陪住细仔啰！自己就同老公争取时间，喺细仔食完雪糕前买晒啲嘢，真系好聪明呀！
争取时间上粮

带仔女行超市，好易畀佢哋搞到买漏嘢，不过小朋友有嘢食就会定晒，真系同「电子奶嘴」一样咁有效，Marie两公婆都深明呢个道理，一入超市就买杯朱古力雪糕畀细仔食，靓妈仲忍唔住食咗两啖，Anderson食得鬼咁滋味，由本来企定定食，到后来直接坐喺人哋啲摆设度慢慢叹。期间同工人姐姐有倾有讲，不过话晒有疫情，喺街除口罩食嘢都几危险。Marie就同老公争取Anderson食呢一杯雪糕嘅时间，买晒所需物品，非常快手。
认真拣维他命

除咗食物，Marie仲买咗支液体维他命B，睇返介绍就话有助提神醒脑、纾缓压力、增强抵抗力，仲话液体配方更易吸收，大人小朋友都食得。疫情下抵抗力好紧要，尤其家中有小朋友，相信Marie都好怕小朋友中招，埋单前仲揾个员工问清楚，比起买其他食物更加认真。以往Marie入得商场可能都会去行吓名店，但当日佢哋一家离开超市就直接上车返屋企，避免在街上逗留太耐增加染疫风险。