有钱仔每月畀几千蚊家用 Tyson Yoshi最怕做2.0无兴趣签公司

头条日报-娱乐

更新时间：08:23 2021-12-09 HKT
发布时间：00:00 2021-12-09 HKT

　　因为爆肌演《拉阔音乐会》，令27岁本土歌手Tyson Yoshi（程浚彦）人气急升，仲被踢爆家住深湾千呎海景豪宅。连人气王姜涛都系佢fans，问到两人会否合作一首歌时？Tyson Yoshi即推介电脑存货《If I Die tonight》：「彩排时见佢出event晕低就谂呢首歌，如果我今晚死嘅话可以讲乜呢？呢首歌颇为探讨内心主题。」采访：方骞平摄影：沈健程发型：Jim Tse@ Hair Corner
化妆：Tong Ming 服装：Louis Vuitton 场地：Reality Goods Studio
　　Tyson Yoshi 3年前才正式出道，其中送畀女友嘅拍拖纪念作《Christy》，YouTube有过千万点击，他坚持每首歌都要有真实性，有自己嘅故事同感受，唔钟意啲冇灵魂嘅歌，而姜涛喺event晕低都带畀佢创作灵感。
冇缘签唱片公司
　　Tyson Yoshi唔抗拒同姜涛合作：「可以呀随缘啦！我有首《If I Die tonight》demo好啱佢，喺《拉阔音乐会》见到佢就忍唔住同佢讲『喂！你记唔记得前排我畀你听𠮶首歌呀？你前排晕咗，首歌好啱你！』姜涛就笑住答『系啰系啰……可以㖞！』」Tyson Yoshi多鬼主意，他解释：「咁（独立歌手）冇人帮我谂，系咁㗎啦！」Tyson Yoshi喺台湾及香港都倾过唱片公司，但理念唔啱：「作为创作者最闷做2.0，但作为老板见好一定会追加，好似叉烧饭卖得就做专门店，大佬呀！音乐嚟㗎！所以我认命唔会签公司，始终音乐系热爱嘅兴趣。」
　　问到系咪作为「富二代」有钱就任性？他却反问说：「我系咪有钱？我唔知㖞！I am whatever you want me to be（你想我系咩都得），冇所谓，开心就得，最紧要唔好影响到屋企人。」他坚持可以自给自足做音乐，每个月仲可以畀几千蚊家用。