自嘲《造星II》孤儿被淘汰有啲嬲 Jerry继文睇住ALAK大唔认同花姐

头条日报-娱乐

更新时间：04:18 2021-10-22 HKT
发布时间：00:00 2021-10-22 HKT

　　ViuTV选秀节目《全民造星》系列为香港娱乐圈带嚟大量生力军，全女班《造星IV》又将于11月1日播出，讨论区有唔少《造星》Fans都戥第二季的参赛者唔抵，播出时撞正社运加疫情令收视大跌，另外成功出道的囝囝一只手数得晒，剩落《造星》孤儿一大堆，包括50强止步的潘俊维（Jerry）同梁继文（继文）。采访：秦咏姿摄影：叶君海

　　Jerry同继文是杨乐文（Lokman）、王智德（Alton）及何启华（Dee）的好友。两人都曾经幻想，如果有玩《造星I》可能已经弹出咗。继文冇打算做幕前，又怕上节目会被人评头品足所以冇报名第一季。但Jerry原来都有玩《造星I》：「我面完试花姐话畀我入围，但我去咗做HotCha演唱会。系可惜嘅，亦好后悔，坦白讲我跳舞识嘅都入晒MIRROR同ERROR，卢瀚霆（Anson Lo）同江𤒹生（AK），我睇住佢哋大。」好友有好成绩佢都开心，但更想自己都有好成绩。
继文冇输过但被Foul
　　两人喺《造星II》50强分组赛中，是A组唯一胜出嘅组别，最后同组只得杨乐文（Lokman）同方震扬（Rain P）有得留低。继文坦言有啲嬲：「我由第一回合到最后回合『随意门』都冇输过，冇去过复活区，最后Foul咗我。」Jerry都有同感：「我哋表演自己谂，人哋就有排舞师谂，最后结果系我同继文输，我咪嬲啰！我唔系嬲人哋有人帮，我嬲自己全心全意谂个表演，最后表演好睇，但自己唔够耀眼。」
　　节目监制黄慧君（花姐）以难单飞作淘汰Jerry同继文嘅原因，Jerry难以认同：「如果佢哋畀我好似《造星III》咁带Dancer比赛，我唔觉得我单飞唔到啰！同埋2019年MIRROR有边个单飞到？我唔系嬲佢咁讲，其实佢都系揾个原因Foul我哋。」两人冇怪节目组，明白自己实力唔够，继文：「实力不足以令佢哋服我，畀我入围，参加时机又唔啱，我唔会将所有问题怪晒人嘅，唯有靠自己努力。」