Band仔转做演员考保险健身地产牌傍身 Ronny@Mr.目标拍剧唔好阻人收工

头条日报-娱乐

更新时间：04:18 2021-09-04 HKT
发布时间：00:00 2021-09-04 HKT

Band仔唔玩音乐唔夹Band仲可以做咩！？乐队Mr.结他手Ronny（黎泽恩）去年底正式签约邵氏，由Band仔转型演员重新出发。其实Mr.自16年宣布约满环球唱片后，虽然19年曾举行出道10周年演唱会《Everyone Concert 10》，但实则工作已全面停顿，Ronny坦言当时一度意志消沉，加上失恋，甚至谂过转行，先后考了保险经纪牌、健身教练牌及地产经纪牌，却遇上今次新机会，一直对演戏有兴趣的他，以42岁之龄再出发，Ronny唔敢谂攞影帝做主角，做到唔阻人收工已经是目标。
撰文：杜淑霞
摄影：梁志明
场地：
Fandm Fitness Music
Mr.跟环球唱片完约后，有段日子Ronny加入失业大军，靠住积蓄过活，「𠮶段时间处于失业状态，你冇得谂有冇其他公司签你，好似之前咁又再创高峰，过程当中唯一帮到你系自己，虽然之前储落一笔钱，但系使得好快，借𠮶个空间去学嘢，首先考咗个保险经纪牌，我哋做呢行时间系好多，呢样嘢同呢行系比较夹，时间弹性少少，始终保险都系做自己生意，虽然我o依家冇特别去做，但起码𠮶时令到我觉得我系可以再读番书。」
试过带人睇楼
之后Ronny再考健身教练牌，主要用来帮自己，「我都有伸展教练牌，点样去防止受伤，我本身有椎间盘突出，以前弹结他翘脚，企𠮶时又扮型侧埋一边，盘骨歪咗，脊椎侧弯，小小碰撞椎间盘就会突出嚟，我学都系帮自己，o依家甚至可以揾埋食。」之后Ronny睇准香港是地产及金融挂帅，再考埋地产经纪牌，「我会考系觉得香港系比较单一嘅城巿，主要都系地产同金融，地产经纪好似少求人买楼，通常人哋要买就要揾你帮手，同埋又可以利用自己人脉。我有落实去做过，帮朋友个地产舖当去学嘢，真系有试过带人去睇楼，知道点同人讲嘢嘅技巧，见过啲临时买卖合约，又系另外一个体验。」
考了一身牌的Ronny，早前因合作网络电影跟李美慧熟络，在对方介绍下去年跟乐易玲倾合作，最初他都担心自己超龄，但谂真觉得冇嘢输，「旧年我都41岁，会唔会要我由训练班读起，真系搞唔掂！但呢两年我学识唔会Say太多No，乜都话唔好，好多嘢都要畀自己突破去试，无论结果系点，反正都系冇损失，好好彩乐小姐同经理人都畀个机会我试，旧年12月签约到o依家都有好多机会畀我，参与过3、4套剧，啱啱演紧邵氏《廉政狙击》，虽然系啲少少戏角色，但系每日喺度学紧嘢。」
夹份开健身室
讲到签新公司目标，Ronny坦言最重要不阻人收工，看似好简单，其实要做到都唔容易，「首先你要做好自己嘅嘢之余，人哋要收货，呢件事好紧要，呢句说话包含咗好多嘢，唔好迟到、要记剧本，要揣摩角色，要同人有交流，我唔会话我目标系做影帝，呢个好讲天份，但系做到唔阻人收工系好好目标嚟，达到呢个目标先，每一次去到人哋都觉得呢个系好演员，做到一个专业演员，如果我一直keep住呢个状况，又做到唔阻人收工，我觉得有机会㗎㖞！（keep住状况好紧要？）我唔系林雪嘛！我唔系玩佢呢只形，我系一定要keep住个样𠮶啲嚟，如果唔系啲监制点解要揾你，我揾其他演员都得。」
由于幕前收入不稳定，Ronny虽然冇做地产经纪及保险经纪，但仍有教人健身及结他帮补，更跟朋友夹份开这天拍摄这间健身室，「拍档本身系我健身学生嚟，佢同另一个拍档问我有冇兴趣，钱我出唔起，但可以帮手营运同宣传，甚至乎喺度教埋，反正我都教开，佢哋都胆粗粗抛咗40万嚟开。」Ronny跟Mr.年代比明显大只了不少，原来当时失业加上失恋靠健身重拾自信，「𠮶时又系冇拍拖，望住块镜问自己可以做咩，啱啱开完红馆骚会觉得冇理由又教番结他百几二百蚊个钟，虽然冇问题，但𠮶时未接受到，就开始做健身，觉得唯一控制到嘅嘢就系自己。」