拉旧队友郁礼贤加操跑街林咏伦积极为E-kids合体备战

头条日报-娱乐

更新时间：04:52 2021-08-07 HKT
发布时间：00:00 2021-08-07 HKT

　　E-kids的林咏伦(Alan)之前参加《全民造星III》后回春翻生，疫市下嘅收入都较以前激增3倍，密密有job接，今年仲有啲大project搞，唔排除疫情缓和后，最快年中后举行音乐会，当然会益埋《造星》战友及E-kids旧队友。Alan日前拉埋E-kids成员Tim（郁礼贤）跑街，他要将积极态度，感染埋退下火线嘅Tim，好让他为未来合体开show备战。采访：方骞平
　　虽然林咏伦喺《全民造星III》30强止步，但不论知名度、收入及形象都带嚟正面成果，启发他做人唔好太冇自信，喺唔损人利己情况下，勇于争取系好事，他有感而发说：「E-kids一向好负面，以前啲人focus只系落喺Tommy（阮民安）度，冇人知我系边个，成日混淆我同Tim，直至上年参赛后终于分得出，形象仲变得正面晒，真系好托赖。」
E-kids从来冇拆过伙
　　keep到团火嘅Alan继续说：「o依家要把握黄金时机搏老命，追返过去流失嘅时间。」Alan坚持E-kids仲有生存价值，唔排除将来再合体。Tim附和说：「就算18年前啲人都狠批我哋做唔住啦！我哋咪又系咁样做落去，就算o依家E-kids得返100个fans，我哋都会做。」Tim坦言E-kids三兄弟曾经历过猜忌，甚至唔钟意对方时候：「以前我冇咁大爱，但人大咗，会互相包容及支持，所以我见佢参赛压力咁大，我好撑佢。o依家佢冇忘本，佢掂会益返啲兄弟，我哋做兄弟嘅点都唔会输。我好爱佢，就算喺乜状况下都爱埋Tommy仔，其实我哋三个从来冇拆过伙。」Alan赞同亦认为做兄弟要互相推动，亦要互相迁就，毕竟每人都会有长处及陋习。