参加《造美人》3个月食唔饱冠军Stella为做女版强尼战胜肚饿

头条日报-娱乐

更新时间：04:17 2021-07-31 HKT
发布时间：00:00 2021-07-31 HKT

一般选美斗靓斗好身材，ViuTV的另类选美真人骚《造美人》就啱啱相反，参赛者要挖出自己最丑一面，连主持强尼、沈殷怡同练美娟都佩服她们的勇气。本身做直播主持的冠军27岁Stella（杨芷羚）亦承认要冒住打烂饭碗的勇气参加比赛，中途更辛苦到想过放弃退赛。而Stella跟亚军29岁Ice（严楚翘）和季军24岁Ann（陈芊妤）参赛其中一个原因都为在娱乐圈发展铺路，Stella坦承想成为女版强尼，主持演戏瓣瓣掂，想向演员路发展的Ice和Ann就最想跟邓丽欣和凌文龙合作偷师。
撰文：杜淑霞
摄影：梁志明
Stella一直好想玩真人骚，因觉得自己性格好适合团体生活，但之前见到《广告女皇》或者《美选D.n.A》总觉得自己样貌同身材都未Ready，直至见到《造美人》个post，「可以接纳你觉得自己唔好嘅嘢，甚至系样貌身形，我觉得好吸引我，呢次冇得say no啦！」对于三位主持都认为参赛者勇气可嘉，Stella坦承是抱住打烂饭碗的勇气参赛，「因为我本身系做直播，系有滤光镜，着衫又可以遮同埋化妆可以就唔同角度，但如果上电视，我嘅身形系乘大一点五倍，我嘅勇气系打烂饭碗，最惊系打烂咗个饭碗又黐唔番，好彩最尾个名额畀咗我入围。」
辛苦到想退赛
镜头前性格开朗，属心态好积极参赛者的Stella，原来面对地狱式减肥，决赛前亦一度想过放弃退赛，「我有3个月，冇超过一个星期食正常餐，但系𠮶100日我系唔觉得辛苦。去到决赛最尾，我有一个半礼拜冇食过任何淀粉质，真系觉得好辛苦，我哋又长时间要排舞，有一刻我系想退赛，因为我真系好攰，我觉得自己又瘦咗，真人骚又去到尾段，我想要嘅得益都攞咗，我又唔系求冠军，工作人员feel到我情绪好down，同我讲『你差一步，咁大分别咁fit，唔行埋呢步好蚀㖞！』𠮶刻我调整番自己心情。」除了想令自己变靓之外，Stella坦承参赛亦为娱乐发展铺路，因明白做直播主持不可能做一世，未跟ViuTV签约的她，如果有机会加盟，除了望有机会跟当红的MIRROR和ERROR合作外，更加视强尼做奋斗目标，「想做女版强尼，强尼佢唱歌好听，又可以做颁奖嘉宾，又可以做埋司仪，仲可以做评判，呢个系目标嚟。」

输在上围级数
虽然输了给Stella，但Ice和Ann坦言输得心服口服，不过因三人感情劲好，又搞笑互窒时爆肚指她们只是输了给Stella上围cup数，Ann说：「我波细一定比唔上波大𠮶啲㗎啦！哈哈！」Ice说：「我哋系斗改变唔系斗靓所以冠军系唔靓㗎！哈哈！去到节目中间我都好想验证一样嘢，就系我唔系眼大鼻高𠮶啲，又唔系身材玲珑浮凸，我系咪一世都唔靓，出嚟攞第二㖞！（Ann：我哋输咗个波！）𠮶零点4分，佢个波值零点4咋！差个cup！哈哈！其实节目话畀其他女孩子听，靓唔系得一个方式同倒模嘅。」本身做演员的Ice，以及在演艺读书的Ann两人都承认得奖后加强了入行信心，亦希望有更多演戏机会，Ann最想跟凌文龙合作，「我哋本身识嘅，我哋上戏剧堂佢好多时都会坐喺度。」Ice就希望跟邓丽欣学嘢，「我觉得佢演得好好，唔系初出道净系卖外表，可爱𠮶啲，而系真系好有戏。」