「AO黎明」60岁继续追梦杨立门做全职歌手欣赏MIRROR

头条日报-娱乐

更新时间：04:18 2021-06-11 HKT
发布时间：00:00 2021-06-11 HKT

　　「AO黎明」杨立门(前任发展局常任秘书长)（Raymond）于6年前提前退休，之后做咗几年香港中华厂商联合会行政总裁，月多前请辞，冇官一身轻的他，60岁继续追梦！目前正赶紧为6月15日喺文化中心举行嘅《杨立门的音乐回忆音乐会》彩排，虽然人到中年但仍紧贴香港乐坛，一啲都唔Out：「我最钟意欣宜、林家谦，MIRROR都好正呀！」采访：方骞平摄影：谭壹致

　　因为疫情关系，杨立门演唱会由去年押后至今：「原先以为搞唔掂，因为限聚令只容许一半入座率，条数计落唔化算，好彩疫情缓和放宽到七成半观众，咁啱6月份文化中心有个期就嗱嗱声擸住。」
　　杨立门唔担心疫情，「因为台前幕后会做晒核酸检测，除咗我之外，幕后团队同观众都会戴口罩，正如戏院开返，都冇出现过戏院群组啦！」最令他惊喜是贵飞一早卖晒，可能观众饿咗演唱会好耐。他透露个唱邀得赵增熹客串伴奏几首歌，仲有何婉盈及小龙女（龙婷）任嘉宾，另外他创作的两首新歌《哀乐之年》及《she is my lady》亦于演唱会中首唱：「我喺官场都几十年，老人牌都拎埋，乜都够啦，人系要有理想嘅，o依家可以全职做歌手去追梦，好好享受人生。」对于演唱会Rundown，Raymond说：「我会唱林子祥嘅《最爱是谁》、经典老歌《Longer》等。」问到好留意香港乐坛的他会否唱姜涛的《蒙著嘴说爱你》？Raymond笑言:「唔识唱佢嘅歌，因为未必啱我唱，我当然识佢，仲好欣赏MIRROR，因为Boy Band边唱边跳好养眼。」另外，他也喜欢创作歌手林家谦及好唱得嘅欣宜。