■肥仔话渴望单飞好耐，「成日访问都话想单飞，但飞极都飞唔起，终于飞得起。（Edan：首位飞得起，终于飞甩ERROR！）」

同Edan齐单飞拍过百万大制作MV 肥仔梁业狂碌人情牌兼倒贴

头条日报-娱乐

更新时间：04:17 2021-01-27 HKT
发布时间：00:00 2021-01-27 HKT

旧年《全民造星》出身歌手，在乐坛真系几威威！新人的Jer（柳应廷）和Anson Lo（卢瀚霆）＠MIRROR成功喺颁奖礼攞到新人金奖，而今年有呢期劲红Edan（吕爵安）＠MIRROR同ERROR队长肥仔（梁业）接力单飞，推出新歌《E先生连环不幸事件》同《Lady Killa》。Edan单飞揾到猛人黄伟文（Wyman）写词够晒面子，不过跳得的肥仔仲劲，新歌竟想挑战韩国天团BLACKPINK韩式劲歌热舞，处女MV制作成本高达百万。原来两人听到花姐一句「睇你今次成绩先决定有冇下首歌」，所以实行玩All In，搏尽！
撰文：杜淑霞摄影：张咏森发型：Lydia Yung、Denny Ku@Chic Private I Salon
化妆：Circle Chong、Cori [email protected] Makeup
服装：Homme Plisse by Issey Miyake(Edan)、
Rule_crossing.men(肥仔)
成为首个MIRROR成员邀请到Wyman填词，Edan超紧张，加上听到监制Edward Chan话：「Wyman唔畀人咬唔正佢啲词㗎！你要加油喇！」令不嬲咬字都唔多掂的他唯有加紧练习，「我每日读报纸去校番啲读音，我喺香港出世，但系爹哋妈咪系大陆人，学广东话跟佢哋学唔系咁纯正，但录音咬字好紧要。」早前Edan同《头条》先张扬想揾Stephy（邓丽欣）做MV女主角，但最终放弃咗，「出唔起钱？我愿意出钱嘅。啲钱去晒肥仔个MV度？哈哈！」肥仔笑言：「我out bud out到打电话，『喂！阿爵爷你个MV点样呀？未搞掂不如拨啲（钱）过嚟呀！』」
做得唔好惊冇下次
肥仔解释超budget，除邀请20多位舞蹈员伴舞，还因太贪心，「我卖点系跳舞，净系揾4个咁跳好弱，好彩我人缘好，叫啲朋友帮吓手半拍膊头，有方方、Tank。入面仲有啲武打场面，揾咗特技人同吊威吔嘅人员。（Edan：同肥仔同期出歌好大压力！）如果计足收钱，真系要过百万嘅，花姐应该斩死我，不过后面都系自己呕出嚟。实际用几钱？一定有六位数字，实际out几多就唔讲啦！自己呕几多都唔好讲啦！」原来MV拍足两日，后期仲要加CG，连花姐都忍唔住话：「Edan你走先啦！」睇见Edan扮晒喊，肥仔即时补充：「MV故仔讲《Lady Killa》以吸血鬼猎人去包装，有啲CG嘢先帮到吓手，唔系就流得滞！」不过 Edan明白肥仔瞓身内情，「都要㗎！分分钟系我哋唯一一首歌嚟！」因花姐讲过，「睇你今次成绩先决定有冇下首歌。」肥仔说：「死啦！做得唔好冇下首歌㖞！系咁掉钱落去，All In啦！」不过，肥仔觉得倒贴都值得，「系自己嘅投资，有机会单飞㖞！我今次嘅曲风偏向韩国，你当香港BLACKPINK都得，因为有个梦想，有一日可以企喺MAMA台上，自己又唔系冇能力做，话广东话配落韩国曲风好难？！我做畀你睇，都系唔好咁嚣张！（Edan：你啱啱嚣张完，BLACKPINK㖞！）哈哈！」