【头条独家】签新公司首推《第一亿次细胞分裂》 布志纶望给大家力量撑下去
更新时间：16:21 2021-08-27 HKT
发布时间：23:00 2021-08-26 HKT
发布时间：23:00 2021-08-26 HKT
字体大小
Alan其实签约新公司已大半年，但最近才有作品推出，他解释没有偷懒，只是一直的创作觉得未是适当时候面世，「一路都有写歌，但呢一两年香港或者全世界都发生咗好多事，好多嘢大家唔系咁容易开心，我作为创作人写嘅嘢一定会畀大氛围影响，所以一路以嚟写嘅歌都唔算特别正面，因为根本正面唔到，好自然有种伤感。公司觉得我嚟到新地方，想带番啲希望畀大家，并不是带住一种沉重，𠮶啲歌并不是唔好听，只系唔适合作为第一首歌发表。开会拣唔到歌，我第二日去咗攀石，喺运动期间天气又晴朗，畀番啲力量我，𠮶刻写咗句『It is another day』都放咗喺只歌入面。」
多作音乐新尝试
填词人陈咏谦用了细胞分裂作借喻，Alan希望畀到大家正向鼓励，「我哋唔想变成一件老土嘅事，细胞借喻去我度，以前Mr.系5个人一个团体，𠵱家我得一个人，单细胞唔代表唔可以分裂，我都可以自己做，其实都自己做咗好耐。」除了做音乐靠自己，疫情期间他也要靠自己面对困局，「我有段时间冇嘢做，年几前我都试过揸Uber，亦有同朋友搞咗啲小生意。我做任何嘢都系揸住自己宗旨，做我应该要做嘅嘢，唔会摊大手板问人攞，我唔系呢啲人嚟，人哋点样睇我冇辧法，但系都要工作揾食。」讲到签新公司期望，Alan想作多方面尝试，「想做多啲唔同风格，以前喺乐队里面总会有个框架限制，乐队音乐会好有自己风格，好难玩到其他唔同类型嘅嘢，变咗自己做嘅话，可以同唔同嘅人合作，声音上面有多咗唔同演绎。」
