最新「人情公价」掀议!自爆封「呢个数」新娘嫌少 过来人当场即做一步霸气反击|Juicy叮

更新时间:08:02 2026-11-17 HKT
发布时间:08:02 2026-11-17 HKT

有网民在Facebook发文求教,指自己「几十年冇去过婚宴,想请教而家咩价位??」,更老实自爆「我仲停留系酒店800,酒楼500既年代」。与此同时,楼主亦停留在昔日买银行礼券做人情的习惯,好奇发问:「另外银行买礼券要写收款人吗?我以前好似系随便人执到都可以去攞钱」,帖文一出引起大批网民热议。

停留在「恐龙年代」?网民更新最新人情行情

对于楼主「酒楼500、酒店800」的记忆,不少网民笑言楼主脱节太久,甚至有人打趣反问:「点解会几十年冇去过,绝对唔合理,一系坐左几十年监,一系昏迷几十年最近苏醒。」、「你都系恐龙年代,廿几年前如果去得饮嘅话起码都1000落楼」。有网民亦建议楼主「你问得嚟去问ai仲快啦」,惟楼主无奈回应:「我唔识啊」。

谈到现时的实际行情,大批热心网民纷纷报价,较为主流的意见认为现时「酒楼800至1千」、「酒店1000至1500」,或者「1200好似系基本,我Frd 啲就比1500,好Frd 就1800啰...」。不过亦有网民提出更高门槛,直言「如果去,酒楼$1000以上,酒店$2000, 否则随时反面收埸。」、「酒楼1500,酒店2500」,甚至有网民语出惊人表示「我一向都比5000,但如果唔去就1蚊都唔比。」、「俾得起就封$5,000人情,我也曾收过,可证记足一世。」

如果决定不出席婚宴,人情又该如何计算?有网民提问「唔去俾几多?」,不少网民认为「唔去真系唔使比,网上写300」、「包500礼到不去饮!」,亦有精明网民抱持「俾$300,唔出席。俾成千蚊1个人,我自己去食好D好过啦!(注:亲戚除外)」的心态。

「请饮」变「夹钱食饭」?按围数成本计人情引爆骂战

在讨论人情银码的过程中,有网民提出一套「成本计算论」,建议「最直接,打去摆酒地点问结婚一抬价钱和人数,例如$6000,一抬坐12人=$500 per head」,有网民更补充「重未计主家带既酒水㖞老细!咁搞法人地蚀水呀!」、「占位系度食嘅,俾番一围成本除人数好合理,理得你食唔食、食几多」。

不过,这种「计数论」即激起大批网民反弹,质疑香港婚宴文化已经变质,有网民批评:「唔洗俾钱先叫请,要俾钱系叫做夹钱食饭......明白无?」、「其实咁多年都唔明,为什么宾客抽空恭贺已很比面及费时,话明系人家请饮,为何出席要夹钱?如果真心有诚意请客到贺赠兴,应该豪气要求不用封钱出席!」。

不少网民更炮轰部分新人摆酒却指望宾客埋单的心态:「未听过摆酒系expect一毛钱都唔洗出,系等人做礼黎埋单嘅㖞」、「咩叫蚀水?如果唔想出钱但又要大排筵席的新人,咁帮唔到你」、「一直都系睇交情,唔系睇系边度摆,唔会因为个酒席几钱而决定人情,咁样同夹钱食蛇宴有咩分别?佢哋摆之前又唔问吓我够唔够钱嚟夹钱饮?」。

有网民更反问:「其实佢几钱围关我咩事?有同事试过去Musea酒店饮十几万一围唔通你封一万银?」、「咁仲有其他各样杂费开支都要成本嘅,不如直接卖门票明码实价啦,做生意应该系咁」。

封800元随时被公审?过来人呻主人家「诈型」

给多少人情除了关乎荷包,更随时考验人性与友情,有坚持封500元的网民直言:「其实俾咁多重大人个口!搅到个个去酒店摆!」、「你系请人,唔系做生意!500已好俾面,唔系白食佢!」、「一律500港元,反面仲好,500睇清一个人,抵到烂」。

不过,给「旧价」随时要面对被嫌弃的风险,有网民提醒「通常800,之后被网上公审,至于几多先会得到赞赏就未见过」。

新娘嫌人情少 「我叫佢俾返人情我,我走唔食啦」

有不少苦主更分享亲身经历,有网民指「见有人酒店宴会,封1OOO都被女主人乍形。」,另一网民亦附和「十年前我咪比人乍型讲紧十年前1千」。更有网民忆述霸气反击的经历:「十几年前邻居嫁女,在小酒家摆酒,我封了$700,仲俾新娘子话封得太少,我叫佢俾返人情我,我走唔食啦~佢的酒席系4千一围,我除返12个人嚟封礼俾佢,已经赚到笑啦,面系人哋畀,架系自己丢」。

面对俗套的礼金文化与动辄上千元的开支,不少网民选择对不熟络的「红色炸弹」敬而远之,直言「有啲新人只求充场面根本唔理人想唔想去,呢啲叫做打秋风」、「今时今日如有人结婚而无请你去飮,先至系你老朋!」。甚至有搞笑网民重提经典电影桥段及幽默应对法,笑称「化骨龙都系摄报纸咋,佢话唔会有人知」、「全晚刺激高潮节目~即埸拆人情」,有网民更打趣建议紧贴电子支付潮流:「Zip个支付宝code入去等主人家自己㩒银码」。

买银行礼券已成历史?网民力劝:用现金最实际

至于楼主在帖文中问及的「银行礼券」问题,亦引来一番讨论,有网民急忙劝阻:「千祈唔好买礼券,真系会烦到收礼人」、「礼券要手续费呀,老人家买都要,咪嘥钱嘥排队时间。」

一名女网民更分享尴尬经历,表示「千祈唔系唔好买礼券」,指自己在某间银行买,结果收礼的人竟表示没有该银行户口,「说入不到」,她更怀疑「不过我唔肯定系咪Z世代以为系支票」,才出现结果佢再入番(同一间银)另一个人户口(就得)」、「我不清楚佢是否将礼卷放入入票机」。楼主见状亦忍不住疑惑回应:「但支票都可以任何银行入落自己户口」。
其他网民则纷纷解答指「基本常识,银行礼卷=银行本票=现金支票。」、「礼卷是银行出的现金票,所有银行都入到」。不过为免除后辈不懂处理或排队入票的麻烦,一众网民最终都建议楼主直接封现金或者用PayMe、Alipay等电子支付,「如果同等价值,个人觉得现金比较好或者再加张贺卡,礼劵未必每个人啱用」、「最少金牛一张入大红包唔折佢可以」,既大方又省却双方的烦恼。

来源:似水流年@facebook

延伸阅读:港情侣「火锅放题店」摆酒 派唐记包点饭券当饼卡 出席者爆人情须「呢个价」