《哪吒》票房背后真相：后生仔用银纸重塑中国生意版图｜林小珍
发布时间：10:37 2025-03-13 HKT
当《哪吒之魔童闹海》嘅票房数字好似坐火箭咁飙升，票房狂揽148亿，全球影史第七，钟意睇戏又钟意八卦市场发生咩事嘅我，见到Tvb星期五黄金时段在七星连珠嘅晚上，让路俾《哪吒1》播影， 当然要开着久违咗嘅电视机， 顺便同个宝贝女亲子乐，全家睇卡通。点知阿女睇完套《哪吒1》，就同佢阿妈讲：「我一定要入戏院睇《哪吒2》」。 睇完，不负众望，我真系要俾个赞。至于点解赞？各花入各眼，睇戏呢啲嘢好主观，所以都系等你哋自己睇。
不过，从投资者角度去睇，背后的大金主、最大赢家光线传媒（300251）股价早前连环涨停，泡泡玛特（9992）啲盲盒被抢到连股价都破晒顶，升至近123元，大摩仲望135元。呢啲商业现象，其实砌紧幅后生仔嘅发达秘笈地图。与其话系爱国情怀大爆发，不如话系后生投资者用真银纸重新定义紧「中国价值」。
1. 二次元经济打烂传统投资饭碗
光线传媒嘅涨停板背后，其实系中国动画电影工业化嘅大变身。由《大圣归来》到《魔童降世》再到而家《哪吒之魔童闹海》，制作周期由5年缩到3年，特效镜头由60%加到80%，呢啲数字唔单止讲技术突破，更加系成套IP开发机制成熟嘅证明。当传统电影公司仲为流量明星嘅天价片酬头痕，动漫IP已经用「零片酬」嘅虚拟偶像杀出新血路。
2. 泡泡玛特破顶嘅后生仔经济学
喺深圳万象城泡泡玛特旗舰店，你可以见到JK制服少女同潮牌后生仔，好似考古学家咁专注摇盲盒。呢种睇落唔理智嘅消费行为，其实暗合行为经济学嘅「惊喜溢价」理论。当00后消费者为59蚊盲盒付出300%情感溢价，佢哋买嘅唔系玩具，而系社交货币同埋朋友圈认证。
3. 软实力变现要靠硬桥硬马
有券商研究所数据显示，故宫文创年收15亿嘅背后，系超过200人专业设计团队同76项外观专利撑腰嘅工业化生产。呢个提醒投资者，文化产品成功唔系撞手神，而系供应链管理、用户画像分析、大数据营销呢啲现代商业手段嘅系统性胜利。
企喺投资角度睇，而家后生仔正用「为爱发电」嘅方式改造消费市场。但精明的投资者应该要识睇，真正有料到嘅「爱国概念股」，肯定系𠮶啲能够将文化符号变做标准化产品嘅企业。当你睇住日线图又有一只「宅男快乐股」涨停时，不妨开个B站睇睇00后嘅弹幕狂欢——𠮶度先至藏住真．发达密码。讲到尾呢个时代，得后生仔者得天下，我个女就系其中一个最好证明。但想坐稳江山，仲要睇企业识唔识将文化情怀塞入工业化流水线。 能够成功突围嘅IP股， 实在不容忽视。
林小珍
相关文章：
Deliveroo撤退、KeeTa崛起 美团攻中东可复制奇迹？｜梁伟聪
港股升幅惊人 街上重见人气 惟楼价难大反弹 李声扬：息口高企 发展商仍有压力
