肥妈闻郑梓浩不屑： 我哋眼角比较高 爆黑妹拣「中二」靓仔小鲜肉做演唱会嘉宾丨独家
发布时间：07:00 2024-11-29 HKT
肥妈（Maria Cordero）与黑妹（李丽霞）相隔7年，再孖住于下月举行《妈妹笑住唱演唱会2024 Part 2》，肥妈继上次瞒住黑妹安排扮学生妹环节，今次再有新搞作，提醒观众要带纸巾和着定纸尿片，以免上下「失守」。肥妈早前做通波仔手术已渐康复，但中呻被黑妹姐监控饮食，两人不停斗嘴好搞笑。提到请几位「中二生」做嘉宾，肥妈踢爆是黑妹亲自拣靓仔「小鲜肉」，问到为何没选郑梓浩？肥妈不屑话：「佢靓仔咩？！我哋眼角比较高！」采访：杜杜 摄影：朱伟彦
肥妈和黑妹在2017年举行《黑．妈妈笑住唱演唱会》时，反应热烈，肥妈说：「𠮶次好笑到剪唔到片，因为一开始都系大家嘅笑声嚟，哈哈！」当时最爆笑环节肯定是两人以学生妹look亮相，今次会否经典重现？肥妈好肯定话：「梗系唔会啦！有新嘢！」黑妹就答得老实，「𠮶件衫我哋都着唔落，哈哈！」
提观众着纸尿片睇骚
肥妈笑指当年怕黑妹口疏，要瞒着她攞尺码，但现在已不用，「我买咗套衫畀佢，佢一着好啱身，我几醒呀！」黑妹笑说：「唔知点解，佢对我身材特别眷顾，哈哈！永远买啲衫都系fit到漏，多啲啲肉都唔得。」肥妈拆解隔空度身都咁fit之谜，「我系大佢一个size多啲，如果我着咗扣唔到钮，佢着就啱啱好，我用我身材同你试身，仲想点呀，哈哈！」至于今次有何特别演出，肥妈就大卖关子，只提醒观众，「如果笑得紧要会标尿𠮶啲，记得着条纸尿片。」她认为带纸巾只能帮到笑到喊，保护力还不够，「唔得要留有准备，上下都要Protect，哈哈！」不过两人写包单不论造型、歌曲和笑话都会令观众满意，肥妈说：「包大家有个好开心，好美丽嘅回忆，我哋主题叫『唱好香港』，会有返𠮶个感觉喺身边。」她们强调歌曲必定是大家耳熟能详，肥妈说：「无嗱嗱整咩新歌，我哋唔得闲搞，我哋都想大家一齐开口唱，咁先至带返起个情怀，唔系咩叫香港情怀啫！」
逐一品评「小鲜肉」嘉宾
讲到演唱会除了请来黑妹契女罗敏庄（Mimi）任嘉宾外，更揾来《中年好声音2》的古淖文、黄剑文和谭辉智演出，肥妈就踢爆是黑妹主意，「唔系我拣，佢契女Mimi就一定啦，另外𠮶几个靓仔㖞！佢好钟意小鲜肉，佢系外貌协会嘅会长，我钟意有胡须，好似我老公好man𠮶啲！」问到负面新闻多多的郑梓浩，同属「中二生」为何榜上无名？肥妈即露出嫌弃表情，「佢靓仔咩？！」黑妹亦不满话：「咦！我讲紧拣靓嘛！」追问她们可能有人觉得郑梓浩靓仔呢？肥妈即不屑谓：「𠮶个人一定唔系我哋两个，我哋眼角比较高。」之后黑妹再逐一品评眼中的靓仔「小鲜肉」，「古淖文佢越嚟越有型，个样就不嬲都靓仔；辉智就傻傻哋，最近我又见到剑文，佢好用心每场骚，所以我拣呢3个都系啱嘅。」肥妈见到黑妹个冧样，即忍不住笑她，「你见唔见到佢对眼，不停眨眼，你有冇见过黑妹姐咁嘅样！」黑妹讲明到时只有她有机会跟「小鲜肉」合唱，肥妈都冇份，「梗系唔畀佢啦，佢都唔钟意靓仔，等我嚟！」
黑妹苦劝肥妈要戒口
肥妈9月时自爆突在家中晕倒，要急送医院做通波仔手术，这天见她已中气十足，她表示康复情况理想，但向来为食的她就扭晒计望着黑妹话：「呢个皇家御用嘅监督，去到上海大闸蟹都只系畀我食两只。」黑妹反驳：「我畀佢食一只咋，佢一定要食多只！」肥妈续说：「以前冇人管我，我一次起码食8至10只大闸蟹，每日就烧鹅、烧鸭、咖哩𠮶啲，𠵱家有好多大内总管，我个仔、工人、朋友都系啦！」黑妹踢爆肥妈仍然好为食，见到大闸蟹就会忍不住，「佢想食，要喂！喂！喂！咁嗌住佢。」肥妈无奈呻，「我睇见啲羔就想摆入口，最衰我个仔企喺前面，牛咁眼咁，佢冇讲出嚟，但系叫紧我唔好郁呀！我咪好心帮人拆肉，可以闻吓啲羔都好，返去未洗手都闻吓，阴功！」不过肥妈都明白身边人都是关心她健康，「我都知，但系有啲嘢真系唔忍得。」黑妹苦口婆心再劝，「你有两支支架喺心脏，仲未完全康复，你再食啲油腻嘢塞住佢，就揾嚟搞！医生讲咗畀我听，叫你唔好偷食蟹、鹅𠮶啲，系西医唔系中医嚟。」肥妈好似小朋友一样驳嘴，情况好搞笑，「个医生话我叻㗎，70岁之后先至摆支架，但𠵱家都摆咗啦，过去嘅嘢唔好提。」
