【饮食】寿司源自东南亚？曾经系战乱走难嘅食品？
上回讲咗刺身嘅故事，今次不如加多嚿饭，讲寿司啦。寿司系日本代表性食物，食寿司，系人都知要去日本餐厅啦。殊不知，寿司同刺身一样，原来唔系起源于日本，咁究竟今次系咪又关中国事？定系同其他国家有关。
呢个饭和鱼嘅组合，竟然唔系源自日本，真系好难接受。
源自东南亚？
讲到寿司嘅起源，至今众说纷纭，只知道，肯定唔关日本事。有人认为，古代东南亚地区，早已有一种被称为 Narezushi 嘅发酵食品，系居住喺山区嘅人，为咗长期保存鱼获，将鱼加盐再用米饭包住发酵，咁就可以放好耐都仲食得。不过，喺差不多时间，中国其实都有人做紧类似嘅嘢。相传春秋时期嘅越国，有一种用块熟面皮，包住糯米、熟虾仁、蛋黄、花生、蔬菜等做成嘅圆柱形饭团，叫做糍饭棒，制作方式，同今日日本嘅握寿司相像，只系材料同形状唔同，因此被认为系寿司嘅始祖。
最早嘅寿司系用饭包住鱼，目的系保存鱼获可以慢慢食。
中国传日本？
到咗后汉时代，中国开始流传一种叫做「鲊」嘅食物。《说文·鱼部》入面就有记载：「鲊，藏鱼也。」，即系用盐、醋、米及蒸熟或炸脆嘅鱼条，同饭团搓埋一齐，变成一个橄榄形饭波。可以加热食，亦可以冷食，十分方便。方便到一个点，就系宋朝年间，战乱频仍，好多走难嘅人，都会整定呢种饭波作为充饥食品，品种更加唔限于鱼，连菜蔬、肉类都可以用嚟入馔，捏制成饭波，走到边就食到边。唐朝诗人段成式写嘅《酉阳杂俎》入面就咁话：「安禄山恩宠莫比，其赐膳品，月有野猪鲊。」，说明原来野猪都可以用嚟做成鲊，寿司原来唔系净系食鱼㗎！
全靠日本人，将寿司变成今日精致嘅饮食文化。
匠人の精神
至于日本，要到公元700年，即奈良时代至开始从中国传入了鲊，日本读音为すし（sushi），即系以盐腌制嘅咸鱼，后来改为用米饭腌制嘅鱼，腌好之后，会一并将鱼同饭一啖食，呢个就系现今寿司嘅前身。寿司喺日本，逐渐普及成为日常食品，渔夫会用醋腌过嘅饭搓成饭团，上面放上海产或肉类，压成细细一块，整齐排喺小木箱入面，方便旅途上慢慢叹。镰仓幕府时代，寿司更加广泛流传，成为日本一种普遍嘅饮食文化。当时嘅寿司，以地域及制作方式，分成两大派别：江户派，就系握寿司作代表。关西派，主打系箱寿司。前者全靠寿司师傅手工握捏而成，即系我哋今日喺东京经常见到嘅手握寿司。后者用个木箱将鱼和米饭挤压成寿司，就是今天流行于大阪一带嘅箱押寿司。无论边个门派，日本人𠮶种精益求精嘅匠人精神，都可以充份喺寿司上体现，呢种精神，唔关边个发明、边度源起嘅事了，所谓达者为先，好食先至系 Win 呀！
靓靓三文鱼做寿司，系香港人至爱。
