【父亲节】自助餐竟然源自海盗？曾被视为极唔文明嘅食法
生蚝，有。虎虾，都有。长脚蟹呢？当然冇漏到。
现场即烤巨型牛扒呢？仲要现点现切㖞。呢，𠮶边咪摆好晒架步啰。仲有沙律吧，各式面包。芝士、火腿、冻肉、莎乐美肠嘅头盘枱。餐汤、热荤、当然唔少得啦。水果、甜品、雪糕……仲有各式各样饮品都可以自取。自助餐，系香港人最最最爱嘅美食方式，冇之一。
海鲜拼盘，有齐龙虾虎虾生蚝蟹脚青口翡翠螺……系自助餐主要目标嚟架。
Buffet系法文，自助餐系日文
今日父亲节，先祝各位爸爸：父亲节快乐。快乐，好多时都同饮食有关。相信呢一刻，好多人正同老婆仔女一齐叹紧自助餐，庆祝父亲节吖嘛。咁，就不如讲下自助餐究竟系点嚟架啦。Buffet，系法文，意思系矮柜。因为法国人会招待朋友到屋企玩，矮柜上面摆满餐点等朋友自取，慢慢人人都叫呢种食法做Buffet。至于将Buffet翻译成「自助餐」呢三个字，就系日本人。昭和33年，即系1958年，东京帝国酒店引入西式流行嘅Buffet，将所有食物放在一桌，客人依据喜好自助取食，名称亦由法文嘅Buffet翻译成汉字嘅：自助餐。
一张餐枱，放满各式各样食物自取，原来系海盗最爱食法。
北欧海盗庆功宴，识食梗系用刀食
呢种自助食法，据说起源于8世纪至11世纪嘅北欧。当时斯堪的纳维亚半岛出名多海盗，海盗抢掠之后，首领会大宴群盗，以示庆贺。但海盗唔熟悉亦唔习惯当时西欧人扮晒嘢食西餐嘅繁文缛节，佢哋费事麻烦，就将所有食物同饮品，放晒喺一张大枱上，边个钟意食边啲，自己埋嚟睇埋嚟拣，拣啱边忽肉，就用刀割落嚟，自己慢慢享用，食完仲用把刀去剔牙，真系豪迈到一个点。呢种自由自在加自助嘅饮食方式，被称为「斯堪的纳维亚式餐前冷食」或「亨联早餐」，就系自助餐嘅前身。
大大块肉，现场即切，真系睇见都流口水。
口里虽说不，但身体很诚实
海盗食法，当然豪迈，不拘小节啦，但就不为当时西欧文明国家所接受，佢哋甚至嘲笑呢种北欧食法，系「不文明的吃法」，不屑一顾。只是，口里虽说不，但身体很诚实。由于自助餐的确无拘无束，随心所欲，选择又多，渐渐有西欧人开始接受并仿傚呢种食法。加上餐厅饭店老板，唔使再为顾客提供侍应等餐桌服务，悭番唔少人工同成本。于是，自助餐好快就风行欧美各国，而且发展迅速，大肆流行。即使到咗今日，西方仲有唔少自助餐厅以「海盗餐厅」嚟命名，足见缘由就系蜕变自北欧海盗。不过，尽管自助餐源于海盗，但规矩已经进化文明咗好多，所以记得唔好争先恐后，或者钟意就成块成碟拎返埋位，因为如果系咁，咁就真系同当年未进化嘅海盗冇分别，系野蛮人嘅行为嚟呀。
任取任食甜品，为自助餐划上完美句号。
