【英国置业】俾 100 镑 deposit 做准屋主！英国买屋究竟买新定旧好？
来英一年了，刚完成另一件大事，就系在英国买楼，系买屋至啱。是的，在英国，租屋租几十年的大有人在，只是眼见租金上扬，又怕被业主踢走，加埋本身系极度唔钟意搬屋 pack and unpack 的人，因此，半年多前已开始周围睇屋。决定买屋，问题便来了，究竟买新屋 (new built) 定旧屋好呢？我不是买楼专家，只能分享少少自己的经验、考虑同睇法，始终新与旧各有所好，没有对错，只系大家的需要不同。
以同一屋型来说 (即系以 detached 比 detached)，旧屋好处系一般来说空间较大，好多甚至有两个 living room，楼底高，有唔少已经做扩建，好似起多个 conservatory，整多间 summer house，添置埋 garden shed，这些「增值建设」随屋送上，方便不少。旧屋唔同年代展现出不同建筑风格与美学，间间不尽相同，比起新楼几乎一式一样，旧楼无疑是有自家风格得多，我的英国朋友就表示只钟情旧楼。
至于唔好处，唔少英国楼真心旧，要知英国屋闲闲地楼龄 50 年以上，旧建筑就算当年用料几好都会折旧。唔少租过有咁上下楼龄屋的朋友都表示，间屋保暖唔得，就算关晒窗开晒 radiator，冬天仲系觉得好寒。买旧屋预咗要做一个详细的 surveyor report，睇下间屋有咩潜在问题，很可能要花一大笔换个硬件，再加埋顺便铺下新地板、换下厨柜，就算 B & Q 有得买料 DIY 都要用上时间金钱，更莫说揾人来装修了。
如果好好彩业主已经执到间屋新净靓仔，buyer 就要有心理准备要同人争同人bid，就算业主接受你开价，仲要睇下间屋有无 chain，即是说假设业主买唔到楼搬，间屋分分钟卖唔成。难怪成日听人讲，搞咗几个月半年，最终都系买唔成得个吉。
新屋好处简单讲就系填补旧屋的缺点。New built 新屋好多时在兴建中仲系地盘时已由发展商开售，即系香港叫法「买楼花」，屋型、几多房、有无车房，价钱明码实价列出，只要你付上 deposit 留一个 plot (地段)，基本上就预留咗间屋俾你，唔再需要 bid 高个价。而最吸引的是 deposit 只系 100 英镑！无错，只系约 $1000 港币就可以 hold 一间屋！到入伙前半年左右，再俾多 400 镑，10% 大订差唔多到收楼前 4 个月才支付，最后尾数系交楼前 2 星期左右收取，可以说未付大订前买家随时挞订都唔肉痛。除非最后俾唔到尾数/ 做唔到按歇令交易取消，否则唔再需要同人争。
New built 新屋自然美轮美焕，而且包 10 年保养，头两年由发展商负责，因此买家一般都未必会做 surveyor report，心态好明显系住落有问题咪叫发展商整啰。新屋用嘅物料一般都符合现代标准，保温效果较好，而且能源效益指数佳，在电煤价格差不多 double up 的今天尤其重要。不过，要留意系新屋的发展商一般售价只包售楼书上列明项目，因此地毯地板、厨房电器、厨厕砖墙砖地、电掣插头好可能样样计钱。有人会觉得好唔 secure，惊价钱无限增加 out budget，不过，有唔少发展商其实都会主动 free upgrade 部分项目，不妨在落订前探听一下 sales manager 口风，大概有个 idea 哪些重要项目需要加钱。至于 free upgrade 多定少，真正因发展商而异，据我所知，第一批最早认购的买家往往得到最多 free upgrade，这个也是明白的。一般新屋厨柜款式屋内间隔都如样版屋，可以拣的可能只系物料和颜色，个人特色相对就无咁大。而我地，由于怕烦，亦自问没有设计天份，加埋遇上一个价格相宜而又邻近学校的新盘，因此二话不说就选择了这个楼花新屋苑，下次再跟大家分享买新屋费用同注意事项。
