KellyChu - 安全岛成雀鸟「公厕」 市民随时「中头奖」 | Executive日记
KellyChu
2025-03-10 02:00 HKT
字體大小
唔知大家有冇试过「中头奖」呢？讲紧嘅唔系真系中六合彩，而系喺街上行行吓被雀屎击中，真正嘅天降「头奖」。大角咀街坊就同Kelly报料话，每次行过奥海城二期与大角咀之间嘅一条必经马路，中间等候红绿灯嘅安全岛，地上总是布满雀鸟排泄物，因为安全岛刚好有条灯柱给鸟儿落脚，牠们就当咗𠮶度系「公厕」！令途人心惊惊「中头奖」。
从地图所见，如搭乘港铁喺奥运站落车，前往大角咀要先经过奥海城二期，于樱桃街与大角咀道之间嘅回旋处过马路，期间需过3个红绿灯，第2个灯位要喺安全岛等候。而该处附近种咗好多树，吸引到鸟儿落脚栖息，不过牠们好聪明，便便都识得揾茅厕，唔会整污糟自己屋企，所以就拣咗一支设于呢个安全岛嘅灯柱作为「公厕」。
街坊每次喺安全岛等过马路，望到地上成堆雀屎都好唔开胃，最怕系等等下红灯「中头奖」！Kelly小时候返学途中亦试过被雀屎击中，校服沾上「奖品」，那臭味毕生难忘！希望食环署多些留意区内衞生情况，加强安全岛嘅清洁喇。不过要点样令鸟儿识得揾另一个地方如厕，又不影响社区环境衞生，也是个难题。
KellyChu
好多雀仔企喺灯柱上，安全岛地下经常布满雀屎。
好多雀仔企喺灯柱上，安全岛地下经常布满雀屎。
最Hit
更多文章
